Endamê Heyetê Rayberdişî yê TEV-DEMî Aldar Xelîlî rewşa sîyasî, leşkerî, dîplomatîk û komelkîye ya serra 2019î ya Rojawanî ANF reyde ercnayî.

Xelîlî ard ziwan ke serra 2019î seba têkoşînê demokratîkî yê Kurdîstanî û Sûrîye serrêka girînge bîye û vat ke mîyanê na serre de eşkera bi ke sere de dewleta tirke hêzê îşxalkerî senî wazenê destkewteyê Rojawanê Kurdîstanî çin bikê. Xelîlî îfade kerd ke heman wextî de seba pawitişê destkewteyan û daşinasnayîşê nê destkewteyan û rastîya şorişê demokratîkî rayaumûmîya mîyanneteweyî reyse prosesêko giran bi.

Xelîlî vat: ''Serra 2019î bîye serra têkoşîn û xoverdayîşê demokratîkî û netîceyê pîlî yê nê têkoşînî. Senî ke Baxoz de çinkerdişê DAÎŞî ame parekerdene heman wextî de seba vergirewtişê îşxalan zî karî ameyî kerdene. Temsîlkaranê komelê mîyanneteweyîyan reyde û hêzanê demokratîkan reyde karê dîplomatîkî ameyî kerdene û seba daşinasnayîşê rastîya Şorişê Rojawanî yê Rojawanî serrêka girînge bîye. Serra 2019î de ame waştêne ke erdê ma îşxal bikê û sîstemo demokratîk ê Rojawanî biwedarê. Vera herême hêrişî ameyî kerdene. La her hetî ra xoverdayîşêko bêhempa vera hêrişan ame mojnayene. No proses serra 2020î de zî do dewam biko.Prosesê şorişî de sîstemo ke temsîlkarîya komelî keno resa astêke. Tarîx de reya verêne no ame meydan. Mîsal wexto ke hêrişê dewleta tirke des pêkerd zaf kesê xerîbî, avûkatê heqanê merdiman, şarê dinya ma reyde bîyî.Tesîrê têkilîyanê fermîyan ê sîstemî zî esto. Dewletanê serekan reyde pêvînayîşî ameyî kerdene. "

"Şarê Efrînî 2019 de xoverdayîşêko bêhempa mojna. Heta peynîye şaristanê xo pawit. Şarê Efrînî bi nê hawayî kerd ke Efrîn bikewo rojdemê dinya. Xoverdayîşê Hêzanê Xelisnayîşê Efrînî heta nika dewam keno. Ma pê bawer ê ke ma do Efrîn bixelisnê. Armancê dewleta tirke bi sînorkerdişê Girê Sipî û Serêkanîye sînordar nîyo. Nika zî dewleta tirka wazena plananê xo dewam bika. Erdogan nêtê xo eşkera kerd. Wazeno Cerablus ra heta Dêrikî îşxal biko. Her kesî zî tesdîq kerd. La nêeşkîya pêro plananê xo bîyaro ca. Coka o û Trump neçare mendî ke adirbirnayîş îmza bikê.

Sere de şarê ma pêro dinya vera na rewşe werişte payan ser. Çar parçeyê Kurdîstanî bîyî yew. Têna şarê kurdî ney, şarê Kurdîstanî pêro tewrê nê xoverdayîşî bîyî. Ciwanî her ca ra tewrê xoverdayîşî bîyî. No zî mojneno ke Neteweyê Demokratîkî resa armancê xo. Ewropa de têna kurdî tewrê çalakîyanê ma bîyêne. Nika pêro ewropayîjî tewrê çalakîyanê ma benê. Xoverdayîşê ma dewam keno. Ma herêma xo pawenê. Ma qebul nêkenê ke bin bikewê. Ma îşxal qebul nêkenê. Şertê ma yo esas no yo ke wa îşxalkerî welatê ma de nêmanê. Îşxalkerî wa Bab, Cerablûs, Efrîn, Serêkanîyê û Girê Sipî ra bivejîyê. Têkoşîn û xoverdayîşê ma do na çerçewe de dewam bikerê.''