Vervatoxa Hemserekîya Îdareyê Xoserî Emîne Osê Qanûnê Sezarî, tesîrê ci yê serê herême û tedbîrê Îdareyê Xoserî ercnayî. 

Qiseykerdişê Emîne Osê ra beşêk wina yo:

''9 serran ra nata rejîmê Sûrîye nêzdîbîyayîşê xo yê sîyasîyî de seba çareserîye gamêke nêeşte. Coka vera Qanûnê Sezarî zî enerjîyêke nêna dayene. La Qanûnê Sezarî seba tengkerdişê rejîmê Sûrîye yeno caardene û do herême rê tesîrêkê xirabî bikero. Xora do Rojawanî rê zî tesîr bikero. Seba ke pêro berê sînorî girewte yê bazirganîye nêna kerdene. 7-8 serran ra nata ma xîret kenê ke hewcedarîyanê şarê xo peyda bikerê. Îdareyê Xoserî seba tedbîran nîqaşî kerdî, komîteyêka krîzî awan kerde ke rewşe îdare bikero. Ma xîret kenê ke nê prosesî ra xo bixelisnê.

Eke rejîmê Sûrîye seba çareserîye gamêka pozîtîfe nêerzo krîz û kaos pêşkarê Sûrîye bibê. Rojawan de Koalîsyonî Mîyanneteweyî, Amerîka estê la aya ke nika bira stratejîke ya sîyasî do bigêra û ekonomîyê Sûrîye destê ci de yo Rûsya ya.

Herême hêzêk çin o ke mesele çareser bikero. Eke rejîmê Sûrîye  seba çareserîya Qanûnê Sezarî dîyalogan bikero hînî ma zî eşkenê çareserîyêka hempare nîqaş bikerê. 

Meseleya bingeyî ya herême meseleya kurdan a. Heta ke meseleya kurdan çareser nêba Rojhelatê Mîyanênî de aramîye nêvirazîyena. Ganî şarê bînî pê mesuldarîye nêzdîyê meseleya kurdan bibê. 

Çarenusê şaran seyci û pîya yo. Ganî kes pê sîyasetê Tirkîya nêxapîyo. Tirkîya pê cerganê xo herêmanê ereban zî talan kena. Vera îşxal û talanî ganî ma yewîya xo bipawê. Vera sîyasetê AKP û dewleta tirke ganî ma pîya têkoşîn bikerê.''