Fermandarîya Pêroyî ya YPJ'yî derheqê rewşa şervana xo Çîçek Kobanê de ke sey birîndare esîr kewte destê çeteyanê dewleta Tirkî, eşkerayîyêka nuştekîye weşanaye û da zanayene ke cuya aye binê tehlûkeyî de ya.

Eşkerayîya fermandarîye wina ya:

"Şanê 21'ê Teşrîna Verêne saete  21 de çeteyanê dewleta Tirkî hêrişê dewa Mişrefa ya Eyn Îsa kerd. Netîceyê nê hêrişî de şerêko çêtin mabênê hêzanê ma û çeteyan de qewimîyayo. Embaza ma Çîçek Kobanê, lingê xo ra birîndar bîya û sey birîndare kewtê destê çeteyanê Erdoganî.Embaza ma Çîçeke, Kobanê de dadîya xo ra bîya û  sey kênayêka ciwane seba ke welatê xo bipawe şerê verba DAÎŞ'î de cayê xo girewt. Xoverdayîşê Rûmetî de seba ke şarê xo û rûmetê xo bipawe xeta Eyn Îsa de ca girewt. Dewleta Tirkîya ya îşxalkare û çeteyê ci yê ke binê adirbirnayîşî de zî hêrişanê xo rê dewam kenê, hêrişê estbîyayîşê cinîyan kenê. Nê hêrişo barbar şexsê na kêneya ciwane de û pawitoxanê welatê xo de hêrişê verba pêroyê cinîyan o. No kerdişo bêexlaq o ke şexsê embaza ma Çîçeke de ame kerdene, verba pêroyê cinîyan ê cîhanî û bitaybetî verba cinîyan ê Rojawanî  ame kerdene. Embaza ma Çîçeke bi hewayêkê birîndarî, nika destê çeteyanê dewleta Tirkî de ya. Cuya aye binê tehlûkeyî de ya. Ma pêroyê cîhanî rê vanê ke cuya na kêneke binê tehlûkeyêko pîlî de ya. No dîmeno ke çeteyan pare kerd, bi hewayêkê tewr eşkerayî rastîye ano verê çiman. Nê kerdişê gemarinî netîceyê polîtîka û pêvînayîşanê mabênê Amerîka, Tirkîya û Rûsya de bîyî. Serê nê bingeyî de ma vanê ganî hetê komelê mîyanneteweyî ra lezabez mûdaxele bêro kerdene. Ma veng danê pêroyê cinîyan ê cîhanî û dezgehanê heqanê merdiman ê mîyanneteweyî ke wa barbarîya çeteyanê dewleta Tirkî rê vengê xo berz bikê. Verba nê kerdişan exlaqê merdimîye bêveng manenê, pêgoşîye kenê ke naye hemkarîya tewr pîle ya verba merdimîye ya. Ganî verba nê zulmî û metotê ke şiknayîşê rûmetê cinîyan hedef gêno, pêroyê cinîyî wurzê payan ser û vengê xo bikê yew."