Endama Têgêrayîşê Komelê Demokratîkî (TEV-DEM) Foza Yûsif Ajansê Mezopotamya reyde qisey kerd. Yûsife va, "Kombîyayîşê Enqara yê 16'ê Êlule dewamê Astana yo. Yeno famkerdene ke 3 dewletî zî verba vurnayîşo demokratîk de yê, ê sîstemê netew-dewlete Sûrîye de pawenê. Wazenê abigêrê prosesê verê serranê 2011'ine. No zî seba Surîye xokiştiş o. Hêvîya Erdoganî tesdîqkerdişê Trumpî yê îşxalkerdişî rê bî. La qasê ma taqîbê ci kerd, waştişê Erdoganî nêame caardene. Erdogan do goreyê xo 'sînorê asayîşî' derg biko. La na rewşe hetê Îdareyo Xoser ê Vakur û Rojakewtenê Sûrîye û QSD’yî ra nêna qebulkerdene."

'Operasyonê Leşkerî Nêno Qebulkerdene'

Foza Yûsif behsa polîtîkayanê îşxalkarî yê Erdoganî kerde û wina dewam kerd: "Erdogan mîyanê rewşêk a têmîyane de yo. Bitaybetî dimayê weçînayîşê herêmî û vînkerdişê hêzê xo yê sîyasî, waştêne newe ra abigêro. Seba naye hewcedarîya ey pê yew 'serkewtişî' esta. Eke Tirkîya de weçînayîşêko pêşwext bêro meydan, operasyonêko verba Vakur û Rojakewtena Sûrîye zî dûr nîyo. Wazenê pê multecîyan demografîya herême bide vurnayene. Na rewşe do qet nêra qebulkerdene û tawirê Îdareyo Xoser zî zelal o."