Îdareyê Xoserî bira dabî ke semedê vîrusê Korona ra Rojawan de pêro dezgehê perwerdeyî mabên bidê. Zanîngehê Rojawanî zî bire daye ke perwerde bi hawayêkê online dewam bikero.

Hemsereka Zanîngehê Rojawanî Rohane Mustafa derheqê babete de ANHA reyde qisey kerd û vist vîrî ke eşkera nîya ke prosesê vîrusê Korona çi wext qedîyeno. Rohane vat: ''Ma do 3ê gulane ra tepîya bi hawayêkê online dersanê xo dewam bikerê.''

Rohane îfade kerd ke dersî pê bernameyanê 'Zoom' û 'Google Classroom' bêrê dayene û ê xîret kenê ke wendekarî telefon û kompîturan ra biresê sîstemê perwerdeyî. Rohane da zanayene ke sîstemê online de ê do wezîfeyê keyeyî bidê wendekaran û bi nê hawayî rewşa înan ercnenê. Dersanê laboratuvaran de zî ê do pratîk û ceribnayîşan pê dîmenan bimojnê.

Rohane eşkera kerd ke Fakulteyê Huner û Mîmarîye de zî wendekarî do xebat û wezîfeyê xo yê keyeyî warê dîjîtalî de bimojnê mamostayan û bi nê hawayî bêrê ercnayene.

Sîstemê onlîne de mamostayî do pê wezîfeyê keyeyî wendekaran biercnê û puanan bidê înan. Rojawan de zanîngehî derbazê sîstemê neweyî yê ercnayîî bîyî. Goreyê naye vîzeyî se ra 16 û fînalî zî se ra 24 tesîrê ercnayîşan bikerê. Îmtîhano verên, cigêrayîşî, proje û tewrbîyayîş zî se ra 60 tesîrê ercnayîşî bikerê.

Rohane Mustafa vat: ''Prosesê Korona derbaz bibo zî ma do dersanê onlineyan heta hamnanî dewam bikerê. Çunke wendekarê ma agêrayî keyeyê xo.''