Hemsereka Têgêrayîşê Komelê Demokratîkî (TEV-DEM) Zelale Ceger hêrişê hemdemî yê dewleta tirke yê vera Rojawan-Şingal-Mexmûrî, armancê nê hêrişan ANFyî rê ercnayî.

Zelale Ceger îfade kerd ke hêrişî 'hemleya qesasê binkewtişî' ya û vat: ''Hêrişê vera Rojawan, Şingal û Mexmûrî mojnenê ke hemleya qesasê binkewtişê DAÎŞî ya. Binkewtişê DAÎŞî yeno manaya binkewtişê Erdoganî. Erdogano ke nêeşkeno xo nê binkewtişî ra bigêro hêrişanê winasênan keno. Her kes zaneno ke prosesêkê winasênî de hêrişê hemdemî yê çinkerdişê planê hemparî yê Erdogan-DAÎŞî yê.''

Cegere bale ante tewirê hêzanê mîyanneteweyîyan ê vera hêrişan ser û vat: ''Nê hêrişî çarçewa komployê mîyanneteweyî de yê. Hêrişî nêdîyenê. Wazenê bi rayîrê dewleta tirke û DAÎŞî plananê xo yê vera Rojhelatê Mîyanênî bîyarê ca. Nêwazenê sîstemê Îdareyê Xoserî dewam bikero. Her kes nêvînayîşî ra yeno. Her kes goreyê menfaatanê xo têgêreno. Erdogano ke wazeno îqtîdarê xo rê dewam bikero, binkewtişê Hesekê yê DAÎŞî ra dima newe ra dest pê hêrişan kerd.

Bi rayîrê nê hêrişan wazenê aramî û asayîşê herême xera bikerê û kaos bikerê. Ganî şar vera ney wurzo we. Aseno ke dewleta tirke 2022 de zî vera şarê ma şerêkê gemarinî bikero. Ne DAÎŞ, ne cergê înan ne zî hêrişê înan nêeşkenê şarê ma bitersnê. Eke Hesekê de şarê ma vera hêrişan têgêra û hetê QSD-YPG-YPJ-Hêzanê Asayîşê Zereyî de vindert ganî vera nê hêrişan zî heman tewirî bimojno. Xoverdayîşê Hesekê mojna ke qet yew hêz nêeşkeno îradeyê ma û waştişê ma yê têkoşînî bişikno. Ganî şarê ma vera hemkarîya gemarine ya dewleta tirke û DAÎŞî pê yewîye cewab bido. Bi azadî û demokrasî ganî şar pêro wurzo payan ser. Akademîsyon, sîyasetmedar ûsn. her beşê komelî ganî meydanan de vera hêrişan wurzê we.''