Îstîxbaratê Tirkî û PDK seba ke Têgêrayîşê Azadîye yê Kurdan, Hêzanê Sûrîyeya Demokratîke (QSD), Yewînê Pawitişê Şarî (YPG) û Yewînê Pawitişê Cinîyan (YPJ) krîmînalîze bikerê, dest pê operasyonê xapînayîşî yê bi nameyê 'remnayîşê domanan' kerdbi la no zûra înan vejîyaye werte.

Keyepelêko ke nêzdîyê îstîxbaratê PDKyî yo, 4ê çeleyî de bi serrnameyê 'Fotograf û nasnameyê 25 domananê ke hetê PKKyî ra ameybî remnayene, pare bîyî' xeberêke kerde.

Hesabêko ke medyaya komelkî de xeberan keno Proaktif Atolye  ( @ProaktifAtolye ) zî xo resna nê domanan û keyeyanê ci.

Pê nê pêvînayîşan zûrê PDK û dewleta tirke eşkera bîyî.

Pêvînayîşanê Proaktif Atolye de eşkera bi ke beşêko pîl ê nê domanan keyeyê xo der o, nînan ra xeylêkan muracatê hêzanê leşkerîyan da labelê semedo ke serra înan qijêr bîye nêameyî qebulkerdene.

Proaktif Atolyeyî bi spotê: ''Gelo PKK domanan remneno? Gelo QSD, YPJ û YPG pê zorî çeke danê domanan? Ma na babeta ke MÎT, PDK û ENKS û tay rojnamegerî giranîye danê ser semedê şima daye pê. Ma domanan û keyeyanê înan reyde pêvînayîşî kerdî. Temamîya pêvînayîşan no yo' floodêk amade kerd. Tay netîceyê nê pêvînayîşan wina yê:

Dîyar Fuad Ehmedo ke goreyê îdîayan ameyo remnayene vat: ''Kesî ez nêremnaya. Ez bi îradeyê xo şîya. Rixmo ke mi israr kerd înan ez erşawita keye. Eke ez biba 18 serre ez do reyna şora.'' Dadîya ey zî vat: ''Lajê mi keye de yo. Ho şino dibistane.'' Babîyê Dîyarî zî derheqê îdîayan de vat: ''Lanet bêro înan. Êyê ke gonîya xo rote wa îftîra nêkerê.''

Lîna Abdulbakîya ke goreyê îdîayan ameya remnayene vat: ''Şerê vera DAÎŞî de mi waşt ez tewra embazan biba. Dima ke embazî pê hesîyayî ke serra mi qij a înan ez erşawita keye.'' Babîyê Lîna yo ke endamêkê QSDyî yo vat: ''Gelo kênaya mi xo remnaya? Ez bi xo endamêkê QSDyî ya. Eke na îdîa rast bibîyêne o çax mi pê destê xo kênaya xo remnaya.''

Cûdî Adnano ke goreyê îdîayan ameyo remnayene vat: ''Ez bi îradeyê xo şîya. Embazan vat key ez biba pîlêr ez eşkera şora. Berê partîye tim mi rê akerde yo.'' Dadîya Cûdîyî zî vat: ''Domanê ke vînenê her hetî ra vera kurdan şer yeno kerdene bi îradeyê xo şinê YPGyî.''

Ronîda Darîya ke goreyê îdîayan ameya remnayene vat: ''Semedo ke serra mi qijêr bîye muracatê mi nêame qebulkerdene. Ez pê îradeyê xo şîya YPJyî. Seba ke ez doman a înan ez apey erşawita.'' Dadîya Ronîda vat: ''Eke lînga domanêke biengilîsa ê vanê Apogîran kerdo. Seba ke şar partîye ra dûrî bivisnê ê wina şerê psîkolojîkî kenê.''

Fetmî Mihemed zî goreyê îdîayan ameyo remnayene. Babîyê Fethîyî vat: ''8 mengî verî domanê ma şi. Pê îradeyê xo şi. 12-13 rojî uca de mend. Embazan o ard. Lajê mi nika tîya de yo.'' Dadîya ci zî vat: ''Homa înan ra razî bo. Înan lajê mi ard. Nika lajê mi keyeyê xo de yo, dewa xo de yo, kar û gureyê xo de yo.''

Esrîne Mihemeda rojhelatê kurdîstanij zî goreyê îdîayan ameya remnayene. Babîyê ey eşkera kerd ke rejîmê Îranî bi zorî pê ey dokumentêk da îmzakerdene ke tede nusîyeno 'kênaya mi ameye remnayene.' Dima zî înan koçê Başûrê Kurdîstanî kerd. Babîyî vat: ''Kênaya mi bi xo tewra ci bîye. Bombardumanê artêşa tirke ya îşxalkere de şehîd bîye. Pê dek û dolabanê zaliman mexapîyê.''

Proaktif Atolyeyî keyeyanê Hêlîne Fehd, Rênas Tahîr, Kewsere Elî û Dijwar Xelîlî reyde zî pêvînayîşî kerdî û ca da keyeyanê înan. Keyeyan da zanayene ke domanê înan nêameyî remnayene  û a xebere seba reşkerdişê PKK, YPG, YPJ û QSDyî ya.

Rixmo ke PKK, YPG, YPJ û QSDyî morê xo da binê Peymana Cenevre û soz da ke domanê 18 serre ra qijêr tewrê karan ê leşkerîyan nêkerê dewleta tirke û PDK bi hawayêkê koordîneyî operasyonê xapînayîşî virazenê.