Çîn de serra 2018î de pitikê ke genê înan ameybî vurnayene ameyî dinya. Bîyofîzîkkar He Jîankuî seba ke genê pitikan vurnayî dinya de bi rojdem û rewşe sey 'skandal' ameye mojnayene. He Jîankuî rê cazaya zîndanî ya hîrê serran ameye dayene.
Cigêrayox He Jîankuîyî teşrîna peyêna 2018î de DNAya cêwîyan verî ke dadîya xo ra bîyî vurnabi.
He Jîankuîyî seba ke pitikî vera vîrusê AÎDSî zixm bibê genê înan vurnaybî. Babîyê pitikan de zî vîrusê AÎDSî bi. Hukmatê Çînî serebûtî ra dima bi îdîaya ''destûrdayîşî'' amebi sucdarkerdene. Hukmat na rewşe ser o He Jîankuî wezîfe ra dûrî vist û derheqê ci de tehqîqatêk da destpêkerdene.
Mehkema Shenzhenî bire daye ke He Jîankuî seba ke genetîgê embrîyo manîpule kerd qasê hîrê serran cezaya zîndanî bigêro. Heyetê mehkeme zî qasê 3 mîlyon yuan (460 hezar dolar) cezaya pereyî daye bîyofîzîkkarî.
Netîceyê nê cigêrayîşan de ame dîyene ke 3 pitikê ke genetîgê înan ameybî vurnayene dadîya xo ra bîyî. Pitikanê cêwîyan ra ber çeleyê 2019î de ame eşkerakerdene ke genetîgê pitikêkê bînî zî ame vurnayene. La nêame eşkerakerdene ke no pitik dadîya xo ra bîyo yan ney.
Seba nê karî 8 keyeyî sey zerrîwazan beşdarê cigêrayîşî bibî û înan ra keyeyêkî dima bira xo ra fek vera dabi.
