Bi wesîleya rojbîyayîşê 76ine yê Rayber Apoyî qezaya Xelfetî ya Amara de festîvala di rojan bi coşî dewam kena.Meclîsê Ciwanan ê DEM Partî bi wesîleya rojbîyayîşê 76inî yê Rayber Apoyî, Amedî ra ver bi Amara rayraşîyayo derg dabi destpêkerdene. Ciwanê ke bi şîarê ‘Ma Komelê Demokratîkî Reyde Ver bi Azadîye Şinê’ rayra şîyî resayî warê festîvale.

Dekewtişê Xelfetî de leşkeran verê ciwanan girewt. Ciwanan bi sloganan û deyîran vera barîkatan xover da. Dima ra bi seyan kesê ke Dîlok, Botan û Riha ra ameyî vera barîkatan dest pê rayraşîyayîşî kerd. Ciwanê ke raştê hêrişê leşkeran ê awa taîzîkîne û bombayanê gazî ameyî, bi slogananê “Bijî Serok Apo” û tîlîlîyan cewab da.

Ciwananê ke rixmê astengkerdişê hêzanê leşkaranê tirkî resayî qeza heta warê festîvale sloganê "Bijî Serok Apo", "Rojbûna te pîroz be ey Serok Apo" vatî. Ciwanî warê festîvale de bi vilikan ameyî verwazî kerdî.

Mustafa Dag û Mahsum Karaoglano ke rayraşîyayîşê Amara ê 2009 de ameyî qetilkerdene fotografê înan ameyî kiriştene û deyîra "Şehîdê Amara" ya Seyda Perincekî ameye goştarîkerdene. Warê festîvale de sloganê  "Şehit namirin" bîyî berz.