Bi kirmanckî nuştiş her çî ke şono beno vêşî û roje bi roje aver de şono. Nê wareyî de şîîre zî sewîyêka başe de ya û xeylê kitabê şîîran hetê weşanxaneyanê cîya-cîyan ra ameyê weşanayene. Nê şaîran ra yew zî Ezîz Gul o. 

Serra 1981 de Dewa Gistoye ke girêdayîya qezaya Erxenî ya de daya xo ra bîyo. Gedeyîya xo dewe de vîyarnaya. Hîna 7 serrîyo keyeyê înan şino şaristanê Erxenî. Hamnanan şinê dewe û zimistanî zî yenê Erxenî. Dibistana seretayî Erxenî de waneno. La Dibistana Mîyanênî nişkeno biwano û fek dibistane ra veradano. 

Wextê ke serrê ey benê 16 reyna dest bi de keno û Dibistana Mîyanênî teber ra waneno, belgeya xo gêno û dest bi Lîse keno. 2002-2003’ne de Zanîngeha Selçukî de dest biwendişê beşa Têkilîya Şarî û Danasîn keno. Di serrî Şaredarîya Girde Şaristan ê Edene de xebatkarî keno û nika zî Şaredarîya Girde Şaristanê Amede de xebatkarî xo domneno.

Şîîranê ey de hesrete, xerîbîye, hesret û birîya welatî, agêrayîşî wextanê verênan, eşq, dej, cîyayîye, teynatîye, hevalîye û taswîrê xozayî cayêko girîng gênê. 

 

Eserê eyê ke hetanî nika weşanîyayê:

1- Ezîz Gul, Sorgu Yarına Kalıyor (şiir), Red Yayınları, Diyarbakır, 2012, 80 rîpelî

2- Ezîz Gul, Dalpeya Cemedyeyên (şîîre), Weşanxaneyê Aram, Îstanbul, Gulane 2013, 42 rîpelî

Şîîranê Ezîz Gulî Ra Çend Nimûneyî:

DALPEYA CEMEDYEYÊN
 

Şaristan, xerebê bi, bêdare û bêvilikanê azadî mend
Yew çîyo ganî qet nêmend
Mêrdimeyî amey qetilkerdiş
Şerrî heskerdoxan rê, qetilkerdişî rêgoş û çimê xo
padaybî
Erd û asmên bêveng mendeyebi
Hişbeye, qilûz û pilisyaye mendbî
Merdimêya erd û asmênî na roje ameye vatiş
Êgîdêya na dinya na roca tarîyên de ame nûştiş

 

ÇI EST O SE MA XO VÎRA BIKE

Şima min ra pers bikê

Wa ey hiş bê

Wa qet vacêr nêbê

Ma xo bi xo qal bikê

 

Wa şewe yew şewa zimistanî bibo    

Ma sobeyê xo panê

Qehran, qalnêkerdişan, neyaran

Ma biberzê sobeyê

Ma pêrînan biveşnê

 

Ma germin bê dormareyê ey de û qalan bikê

Labelê şewe wa bibo derg

Ma demo vîyarteyî de vînî bibê

O ma vernîya xo ra biewnîyê

Çi ciwîyeno se wa biciwîyo

Ma xo bi xo qal bikerê

 

Ma hewrê sîyayan ver ro tîje bibê ke

Wa hewrî vila bibê 

Wa eyema ma akerde biba

Heme çî wa akerde (zelal) bibo

Qet wa şewe bêaşme nêmano

Ma heme çî xo vîra bikê

Çi esto se ma birişnê

Wa di zereyî ma de nêmano