Goreyê cigêrayîşê ke bajarê Munsterî yê Almanya de ameyê kerdene, beşêk depresyonê ke wextê ciwanîye û bado ci de yenê ciwîyayene, girêdayeyê tacîz û travmayan ê ke wextê domanîye de ameyê kerdene.

Unîversîteya Munsterî ra Nîls Opel û gruba ci, resimê mezgê 110 nêweşanê depresyonê giranan ê ke nêweşxane de yenê tedawîkerdene ser o cigêrayîşî kerdî. Cigêrayoxan hetê bînî ra nêweşan reyde serê travma û tacîzo hîsî, zayendî yan zî fîzîkî yê ke wextê domanîye de bi înan ameyê kerdene de, xoşebere kerde.

Netîceyê cigêrayîşî de ame tespîtkerdene, beşê însuler korteks ê mezgê merdiman ê ke wextê domanîye de bîyê mexdûrê tacîzî, hîna qij o.

Beşê însuler korteksî  sey merkezê hîsanê empatî yenê dîyayene.

Goreyê Opelî, travmayê wextê domanîye, mezgî de benê semedê vurîyayîşanê awanîyan û depresyonê nê kesan zî xeylî giran o.  Seba naye zî, ganî depresyonê ke girêdayeyê travmayanê wextê domanîye yê bi metodanê cîyayan bêrê tedawîkerdene.

Opel û  gruba ci nika cigêrayîş kenê ke nê bedilîyayîşê bingeyênî yê mezgî eşkenê çareser bikerê yan ney.