Beşê peyênî yê dosyaya ma de Serekê Pêroyî yê Partîya Azadîye Ayetullah Aştîyî û Hemserekê KCDyî Berdan Ozturkî yewîya neteweyîye ya kurdan û hêrişanê dewleta tirke ser o qisey kerd.

Hemserekê KCDyî Berdan Ozturkî îfade kerd ke hêrişê dewleta tirke yê vera Başûrê Kurdîstanî xîretê îşxalî yê la Erdogan û Bahçelî nê hêrişan înkar kenê. Ozturkî vist vîrî ke nê hêrişê îşxalî vera Rojawanî zî estê û ganî kurdî pîya têbigêrê.

Ozturkî vat: ''Nê hêrişî vera pêro parçeyanê Kurdîstanî yê. Coka ganî ma vera nînan bi hîşmendîya yewîya neteweyîye têbigêrê. Kongreya neteweyîye şert a. Yewîya neteweyîye nêna manaya yewîya partî yan zî dezgehan. Ma qala yewîya kulturkî, komelkî û sîyasîye ya kurdan kenê. Îtîfaqê ma yê partîyan nika mende yo. Seba averberdişê nê îtîfaqî ma xîret kenê. Ma wazenê her parçeyê Kurdîstanî de modelê yewîye bîyarê ca. Coka ma selahîyetdaranê Başûrê Kurdîstanî reyde pêvînayîşan kenê. ''

Serekê Partîya Azadîye Ayetullah Aştîyî da zanayene ke îşxalê dewleta tirke yê vera Başûrî nênê qebulkerdene.

Aştîyî vat: ''Ewro hem Başûr hem zî Vakur û Rojawanê Kurdîstanî de hêrişê îşxalî estê. Heta ke ma îtîfaqê xo nîyarê ca yan zî kongreya neteweyîye nêkerê nê îşxalî do dewam bikerê. Îtîfaqo Kurdîstanî yo Neteweyî nê îşxalan meşrû nêvîneno. Nê hêrişî vera pêro kurdan o. Dişmenê kurdan tim xîret kerd ke mabênê kurdan de alozîye virazo. Ganî ma ney bivînê û vera pêro neheqîyan bigêrê. Yanî heta ke ma de hîşmendîya neteweyîye nêbe nêbena.''