Rojnameyê Ronahî 16ê teşrîna verêne ya 2011î de Heleb de dest pê weşane kerd. Rojname bi kurdkî û tirkî weşanîyeno. Rojname herêmanê Şehba ra heta Dêrikî û Reqa, Tebqa, Dêra Zorê û Minbicî yeno vilakerdene.

Mihemed Xêr Çolî ronîyayîşê ci ra nata 12 serrî yo rojnameyê Ronahî vila keno. O ber bi berî, taxe bi taxe gêreno û xizmetê şorişî keno.

Mihemedo 27 serre şaristanê Hesekê ra yo. 2015 de wextê hêrişanê DAÎŞî de banê keyeyê Mihemedî rijîyeno. Mihemed û keyeyê ci zî koçê Qamişloyî kenê. Mihemed Xêr Çolî seba ke fonksîyonê damarêkê mezgê ci nêxebitîyeno bi cîhazî cuya xo domîneno. La na nêweşîya ey zî ey rê asteng nîya.

Mihemed Xêr Çolîyî ard ziwan ke rojnameyê Ronahî xizmetê şarî û şorişî keno û vat: ''Rojnameyan hêverî xizmetê rejîmê Baasî kerdêne, xîtabê şarî nêkerdêne. La rojnameyê Ronahî rojnameyê şarê ma yo. Ez sey vilakerdoxê rojnameyî tim bena şahid ke şar pê Ronahî çend kêweş beno. 

Ez sey rojnamegerêkî mîyanê şarî de têgêrena. Kuçe bi kuçe, taxe bi taxe û keye bi keyeyî gêrena. Rind o ke ez raşta raşte şar de têkilîye de ya û nêzdî ra şarê ma şinasnena. Rojnameyê Ronahî warê pawitişê ziwan, kultur û mîrasê ma de gamanê destpêkan ra yew bîye.''