Zîndanê Tîpê F yê Tekîrdagî de Abdulkadîr Bozkurtî telefon de keyeyê xo de qisey kerd, dima erzîya hucreyê yewkesî. Eşkera bi ke o hewte 15 gardîyanan hêrişê Bozkurtî kerdo.

Birayê Abdulkadîr Bozkurtî, Serdar Bozkurt derheqê babete de ajansê ma rê qisey kerd.

Bozkurtî dîyar kerd ke her roja pancşemeyî saete 11.00 de heqê telefonî yê birayê ci est bi la birayê ci telefon nêkerdo. Naye ser o Serdar Bozkurtî zîndanî rê telefon kerd û îdareyê zîndanî ey rê vat  ke Abdulkadîr Bozkurtî nêwaşto heqê xo yê telefonî bişuxilno.

Serdar Bozkurtî vat: ''Cewabê îdareyê zîndanî ser o ez qerqilîyaya. Ez Riha de bîya, mi avûkat şawit zîndanî. Avûkat musa ke pêvînayîşê ma yê bi telefonî ra dima Abdulkadîr di reyî raştê hêrişê 15 gardîyanan ameyo, milê ci û tayê cayanê bedenê ci de morî est ê û engiştêkê ci şikîyayo.''

Serdar Bozkurtî pare kerd ke ê do derheqê îdareyê zîndanî de gerre bikerê. Bozkurtî vat ke asayîşê ganê birayê ey çin o û cade wa o sewqê zîndanê bînî bêro kerdene.