Goreyê xebera Ajansê Mezopotamya, bi waştişê Serdozgerîya Komare ya Bursa, Hakimîya Înfazî ya 1. ya Bursaye derheqê Ocalan û hepsîyê bînî ke Girawa Îmrali de yî de qerarêk dayo.

Qerar 6ê êlula 2018î de ameyo girewtene û goreyê qerarî avûkatî do nêşênbî qasê 6 aşmî muwekkîlanê xo reyde pêvînayîş bikerî.

Serdozgerîya Komare ya Bursaye muracatê xo yê Hakimîya Înfazî ya 1. ya Bursa de cezayê hucreyî ke mabênê 2005 û 2009î de dîyaya Ocalanî û mektuba Ocalanî ya ke 2009 de nuşto, sey sebebê qerarî nîşan dayî.

Sebebo bîn yê dozgerî zî wina ameyo nîşan dayene: “(…) Muhtewaya pêvînayîşanê nê kesî û avûkatan dîyayo çapemenîye, raya pêroyî de bîyo rojeve ke Abdullah Ocalanî bi rayîrê nê pêvînayîşan rêxistina xo îdare kerdo û avûkatan zî mabênkarîye kerdo û nêyî heme suc î…”

Edaletê tirkan ke pêvînayîşê ke avûkatan reyde bîyî sey talîmatdayîşê PKKyî girewto dest, vato ‘beno ke hepsîyê ke eynî zîndan de yî, bi rayîrê înan zî talîmatî bêrî dayene’ û waşto ke wa pêvînayîşê Ocalan û hepsîyanê bînan qasê 6 aşmê bînî bêro qedexe kerdene. Hakimîye zî nê waştişî qebul kerde. Îtîrazo ke vera nê qerarî de ame kerdene, red bi.

ÇIRA PÊVÎNAYÎŞÊ 10 SERRÎ VERÊ BÎYÎ SEBEB?

Çira Hakimî û Serdozgerîya Komare ya Bursa pêvînayîşanê mabênê 2005 û 2009î kerdî sebeb, labelê qet qala pêvînayîşanê 2009 û 2015î nêkerdî? Reyna derheqê qedexeyê ewroyî estî de çira çîyêk nêvatî?

2011 RA NATA PÊVÎNAYÎŞ NÊBENO

Muracatê avûkatan 27ê temmuza 2011î ra nata hertim bi mehneyanê ‘muxalefetê hewayî’, ‘keştîye xirabe ya’, ‘keştîye tamîr de ya’, ‘OHAL’ û sewbîna ameyî red kerdene.

CEZAYA DÎSÎPLÎNÎ

Tewr peynî roja 21ê êlule birayê Ocalanî Mehmet Ocalan, waya ci Fatma Ocalane û wasîyê ci Mazlum Dînç seba ke şêrî Îmrali reya 94. muracatê Serdozgerîya Komare ya Bursa kerdî. Labelê na rey sebebê nêşîyayîşî yê bînan ra cîya bi. Dozgerîye dîyar kerde seba ke 14ê êlula 2018î de cezaya dîsîplînî dîyaya Ocalanî, ê nêşênî destûr bidî. Labelê derheqê cezaya dîsîplînî de ti melumat nêdîya. Muracatê keyeyê hepsîyanê bînan zî eynî sebeb ver ame red kerdene.