5 tepişteyê ke seba wedartişê tecrîdê serê Rayberê Şarê Kurdî Abdullah Ocalanî 152 rojî yo grevê vêşanîye de yê, mektûba xo ya ke Wezaretê Edaletî rê şirawtebî de vat, “Garantorê aşitîya Rojakewtena Mîyanêne Birêz Ocalan o.”
Ajansê Xeberan ê Mezopotamya di mektûbê tepişteyan ê bi nameyê Mehmet Bozdag, Cengaver Aykûl, Atîlla Coşkûn Ozer, Omer Kabûl û Abdullah Kizilkayayî yê ke hemverê tecrîdê serê Ocalanî de Zîndanê Patnosî yê Girewteyî yê Tîpê L’yî de 18’ê Kanûne 2018 ra nata grevê vêşanîye de yê, şirawitibî Wezaretê Edaletî weşanayî.
Mektûbê ke destpêkê prosesê çalakîye de ameyê nûştene, îdareyê zîndanî rê ameybî teslîmkerdene, tepişteyan înan de ardibi ziwan ke heta waştişê înan bêrê bicaardene ê do çalakîya xo bidomnê.
Mektûba ke bi nameyê Abdullah Kizilkaya, Cengaver Aykûl, Mehmet Bozdag û Atîlla Coşkûn ameya nûştene de ca dîya nînan: “Amacê dewletanê ke wayîrê sîstemê kapîtalîstî yê, teber ra nizd û halê tifaqî de xo ramojnenê, eslê xo de wazenê welatê ma û şaranê herême esîr û muhtaç verdê, dewletanê herême tim mîyanê pêkewtişî de verdê, bi nê hawayî înan xo rê gire bidê.
Hêzê merdimîye yo ke demokrasî, aşitî û azadîye wazeno û wazeno ke xo pabestişê emperyalîzmî ra bixelesno, do hemverê tecrîdî de bêveng memano. Ma zî sey nê merdiman ra yew seba xelasîya merdimîye û şaranê ma, seba aşitî û azadîye wazenê ke tecrîdê serê Birêz Abdullah Ocalanî bêro wedartene û azadîya ci ya fîzîkkîye bêro bicaardene, polîtîkayê şerî bêrê terkkerdene. Naye ra ma tarîxê 18’ê Kanûne 2018’î ra nata dest bi grevê vêşanîye yê bêdem-bêagêrayîşî kerd.”
Mektûba ke bi nameyê tepişte Omer Kabûlî ameye dayene de zî nê vajîyayî: “Zîndanan de qaso ke nêhûmarîyê problemî estê. Nimûneyê nê zextan yo tewr eşkera tecrîdê serê Birêz Abdullah Ocalanî yo. Qanûn û normê huqûqîyî nênê bicaardene. Rojakewtena Mîyanêne de garantorê aşitîye Birêz Ocalan o. La rixmê nê de serê Ocalanî de tecrîdêko kesif yeno bicaardene. Heta ke tecrîdê serê birêz Ocalanî bêro wedartene, avûkatan û keyeyê xo dir pêvînayîş bikero ez do grevê vêşanîye bidomnî.
Seba ke zextê ke zîndan de ma tepişteyan ser o yenê kerdene û tecrîdê serê birêz Ocalanî bêro wedartene ez 18’ê Kanûne 2018 ra nata kewena grevê vêşanîye yê bêdem-bêagêrayîşî. Heta ke waştişî bêrê bicaardene ez do grevê vêşanîye bidomnî.”
