Operasyonê qirkerdişê sîyasîyî yê Partîya Demokratîke ya Şaran (HDP9 xeylê bajaranê Kurdîstan û Tirkîya de ame şermezarkerdene û semedê têkoşînê hemparî ame vengdayene.

Rêxistina HDPyî ya Amedî kombîyayîşê çapemenî ame kerdene. Xeylêk palameterî û îdarêkarê HDPyî Amedî zî tede xeylêke kesî tewrê kombîyayîşî bîyî. Eşkerayîye de  wina ame vatene: ''Nê hêrişê qesasî yê vînkerdişê DAÎŞî yo. No qesasê serkewtişê Kobanê yo. Berpirsîyarê qirkerdişî ayê ke HDPyî sûcdar kenê. Êyê ke pê faşîzmî payra yê wa bizanê ke HDP ho yeno. Şima bitersî zî, virar şirê kulsîyanê xo ra zî wextê HDPyî ame.''

Serekê Pêroyî yê Partîya Merdimî û Azadîye (PÎA) Ahmet Kayayî û îdareyê partî zî banê partî yê Amedî de eşkerayîye daye û hêrişî şermezar kerdî. Eşkerayîye de ame vatene ke hukm goreyê îqtîdarî têgêreno û edalet werte ra ameyo wedaritene.

Rêxistina HDPyî ya Dêrsimî zî Kuçeyê Sanatî eşkerayîye daye. Hemserekê Partîye yê Bajarî Îbrahîm Kasumî veng da ke wa vera operasyonê qesasî têkoşîn bêro xurtkerdene.

Rêxistina HDPyî ya Çewlîgî zî eşkerayîye daye û vera hêrişan hêrsê xo ard ziwan. Eşkerayîye de ame vatene ke hukm goreyê talîmatê Erdoganî yeno caardene. La ê se kene wa bikerê, rixmê heme hêrişan partîya do merijîyo.

Reyna bajaranê Êlih, Mêrdîn, Şirnex, Semsûr, Riha, Wan, Colemêrgî yê Kurdîstanî û Anqara xeylê bajaranê Tirkîya de bi çalakîyan hêrişê vera HDPyî ame şermezarkerdene û mesajê yewîye û têkoşînî ame dayene.