Bajarê Strasbourgî yê Fransa de vernîya Konseyê Ewropa (AK) de, çalakîya ke seba azadîya Rayberê Şarê Kurdî Abdullah Ocalanî yena viraştene, hewteyo 328. de grûba neweye dewr grewte.

Nobeta Azadîye ke hewteyo ravêrte cinîyanê Îngilistanî tepiştêne, no hewte hetê grûba Normandîya ra dewr girîyaye. Çalakvanê bi nameyê Delîl Ateş, Haci Bayram, Ersîn Tektaş û Ridvan Ferqîn Mehkemeya Heqê Merdiman ya Ewropa (MHME) rê hêrsê xo ardî ziwan û qerarê ci rexne kerd.

Çalakvanan qerarê MHME sey îxlalkerdişê heqanî hesibna û wina va: “Bi nê qerarî qeydeyê Pêkerdişê Heqê Merdiman yê Ewropa zî girîyayî binê lingan. Îşkenceyo ke Îmrali de yeno kerdene, normal vînayîş goreyê huqûqo raştî nîyo. Bi nê qerarî ma hîna eşkera dî ke pêkewtişê kurd û tirkan de engişta Ewropa zî esta. Ewropa goreyê huqûqî nê, goreyê karê xo têgêrana û no zî nîno qebûl kerdene.

Çalakvanan veng da Mehkemeya Heqê Merdiman ya Ewropa û waşt ke wa na xeletî ra peyser agerî û goreyê huqûqî gamêka raşte berzî.