Paytextê Danîmarka Kopenhag de Rayberîya Meclîsê Cinîyan ê Sêvê de kurdîstanijan û dostanê ci seba dîqet biancê tecrîdê Îmalî ser standêk akerd. Çalakwanan derheqê paradîgmaya Ocalanî de  kitab û broşurî vila kerdî.

Heto bîn ra grûbêk zî bi rayîrraşîyayîşêk tecrîd protesto kerd. Çalakwanan bi sloganan faşîzmê Erdoganî rê hêrsê xo ard ziwan û azadîya Ocalanî waşte.

PARÎS

Paytextê Fransa Parîs de zî Têgêrayîşê Cinîyanê Kurdî yê  Fransa (TJK-F) û Konseya Kurdan a Demokrate ya Fransa (CDK-F) çalakîyêk organîze kerde. Xeylî kesî tewrê çalakî bîyî û bi slogananê ‘‘ Ocalanî rê Azadîye‘‘ û ‘‘ Erdogano qetilkar‘‘î  tecrîd protesto kerd. Qalkerdişan de ame vatene ke şarê kurdî do heta azadîya Ocalanî çalakîyan rê dewam bikero.

MANTES LA JOLIE

Bajarê Mantes la Jolie yê Fransa de zî bi çalakîyêk tecrîd ame protestokerdene. Çalakwanan bi broşur û vilawekan derheqê felsefeya Ocalanî û tecrîdî de zanayîş da.

BERN

Bajarê Bernî yê Swîsre de zî Têgêrayîşê Ciwanên Şorişgêrî seba portestokerdişê tecrîdî çalakîyêk organîzê kerde. Gencan bi pankartê ‘‘ Ocalanî rê azadîye, Kurdîstan rê statu‘‘ rayîrraşîyayîşêk viraşt û bi slogananê ‘‘ Tirkîyaya terorîste, Erdogano qetilkar‘‘ î bale ante tecrîdî ser.