Mehkemeya Qanûnê Bingeyîyî (MQB) derheqê wekîlê TÎPî Can Atalayî de bira binpaykerdişê heqan dabî û Mehkemeya Berze ya Temyîzî rê şawitbî. Mehkemeya Berze ya Temyîzî herinda ke bire bîyara ca gerreyê MQByî dabî. Naye ser o krîzê edlîyî qewimîyayî. Serekkomarê Tirkîya Erdoganî zî paştî daye gerreyî. Wekîla HEDEPî û huqûqnase Newroze Uysal nê krîzê edlîyî ANFyî rê ercnayî.

Newroze Uysal ard ziwan ke krîzê nikayênî seba ke meseleya kurdan çareser nêbena qewimîyenê û vat: ''Nê krîzî netîceya bêhuqûqîyan û planê darbe yê. Nê qewimîyayîşî pabesteyê wedarnayîşê heqê destpanêdayîşî yê wekîlanê kurdan ê. Mehkemeyî biranê yewbînan nêşinasnenê. Sîstemo nikayên bi serran o xîret keno ke Tirkîya de sîstemê faşîzmî awan bikero. Xîret keno ke game bi game pêro heq û azadîyanê bingeyînan wedarno. 

Seke ma çend reyî vatbî; bingeyê nê pêro krîzan de çaresernêkerdişê meseleya kurdan est o. Qanûnê ke vera şarê kurdî û Îmraliyî virazîyayî her kes verê nînan de bêveng mend. Nê kerdişan verê qirkerdişan û nîqaşanê serê mehkemeyan akerd. Birê Mehkemeya Heqanê Merdiman a Ewropa (MHME) yê serê Demîrtaş, Osman Kavala û Birêz Abdullah Ocalanî bi serran o nênê caardene.''

Uysale bale ante ser ke Erdogan, AKP û MHP seke Dewaya Kobanê û dewaya qefilnayîşê HDPyî de amebî dîyenê mudaxeleyê mehkemeyan kenê. Newroze vat: ''Nika îqtîdar wazeno ke 'qanûnê bingeyîyî yê neweyî' virazo. Nê mudaxeleyan rê darbe, xîretê darbe û mudaxele yenê vatene. Pêro zî raşt ê la ganî ma bivînê ke îqtîdar seba ke MQB bêtesîr bikero wazeno qanûnê bingeyî yê neweyî virazo û bi nê hawayî sîstemêkê faşîzanî yê mendeyî awan bikero. 

Girîng o ke nê prosesî de partîyê sîyasîyî, rayaumûmîye û rêxistinê sivîlî tewirê xo bimojnê û têkoşîn bikerê. Heta ke meseleya kurdan bi demokrasî çareser nêba Tirkîya do nêeşka nê krîz û xîretanê darbe ra bixelisa. Ma nika prosesêkê hesasî ra vîyarenê. Ma do nê prosesî nêzdî ra teqîb bikerê û refleksanê hewceyan bimojnê ra.''