Tecrîdê serê Rayberê Şarê Kurdî Abdullah Ocalanî rojdem de cayê xo paweno. Çalakîya grevê vêşanîye yê tepişteyan yê bêdem-bidorî roja 184 de dewam kena. Avûkat Serdar Çelebîyî derheqê babete de ANFyî rê qisey kerd.

Çelebîyî bale ante ser ke tecrîd semedê Tirkîya bîyo sebebê meselayanê giranan û vat: ''Demê weşbîyayîşî de mergî bîyêbî kêmî. Rewşa nikayêne goreyê qanûnê Tirkîya nêya. Heqê hukmwerdeyî esto ke merdim û avûkantanê xo bivîno. Huqûq goreyê kesêkî/e cîya nêeşkeno bêro caardene. Eşkerayo ke tîya çîyo keyfî esto. Çîyo ke nika yeno kerdene goreyê mevzuatî nêyo. Seba ke pêvînayîşê telefonî zî nênokerdene her kes qesawet keno. Ganî derheqê nayî de zanayîş bidîyo rayrapêroyîye. Şertî senî benê wa bibê ganî pêvînayîşê telefonî bêro kerdene.''

Çelebîyî raporê CPTyî zî vist vîrî û wina dewam kerd: ''CPTyî zî tesbît kerd û dewlete rê da zayene binpaykerdişê heqan esto û no nêno qebulkerdene. Bi serran o ma vanê, bitaybetî ma dewlete ra wazenê ke wa qanûnê xo bîyaro ca. Seba ke no waştiş nêno caardene her kes hersbîyaye yo û ma eşkera dewlete rê vanê goreyê qanûnê xo têbigêre.''

Av. Serdar Çelebîyî vat: ''Ma sey pawitoxanê heqanê merdiman tim vanê ke çîyo ke zirar dano bedenî tira dûr vinderê. Cayê ke tewr zaf tede binpaykerdişê heqan estê, zîndan ê. Seba ke ê nêeşkenê vengê xo dêsanê zîndanan ra bidê eşnawitene mecbûr manenê ke rayrîranê bînan bivîjnê. Waştişê wedartişê tecrîdî esto, wazenê vengê înan ê vera binpaykerdişê heqan bêro eşnawitene. Zîndanan de probleme giranî estê. Bîlasebeb cezaya dîsîplînî yena dayene, heqê telefonî destê înan ra yeno girewtene, Înfazî yenê vêşnayene. Çalakîya ke vera nê zextan yena kerdene nêvînayîşî ra yena. No zî merdiman qehrneno.Tirkîya na babetede wayîrê tecrubeyanê talan a. Coka ganî  cade gamî bêrê eştene ke reyna dejê giranî merê ciwîyayene.''