Çewlîg de vizêr ramitoxanê otobusanê mîyanê şaristanî serkêşîya Kooperatîfê Ramitoxanê Wesayîtanê Bimotoran ê 18. de kontak qefilna. Ramitoxan otobusî verê kooperatîfî de park kerdî û nêxebitîyayî. Hemwelatîyan taksîyî şuxilnayî.

Serekê Kooperatîfî Nîhat Kayayî bira grevî eşkera kerde û da zanayene ke zemanê sotemenî ra hinî înan de qewet nêmendo.  Nîhat  Kayayî ard ziwan ke janê Korona ra nata her menge ê zerar kenê, vaya sotemenî vera zêdîyena û vat  şaredarîya Çewlîgî ya AKPyî zî pêvînayîşan de meseleyê înan çareser nêkerdê.

Kayayî vat: ''Şaredarîye sozê ke dayê ma nêardî ca. Ma zî bira grevî girewte. Şar wazeno wa şaredarîye xizmetê resî bikera. Ma zî şaredarîye rê no çi vat. La Şaredarîya Çewlîgî ma rê vat 'Ma hema nêeşkenê sotemenî dekerê wesayîtanê xo.' Ma waşt ke şaredarîye hetkarîya sotemenî bida ma yan zî vaya resî bizêdîna. La şaredarîye 3 mengî yo ma vindarnena.''

Çewlîg de 80 otobusê mîyanê şaristanî est ê û hema hema pêro selahîyetê serê sefer, guzergeh, pereyê resî û kontrolî destê şaredarîye de yê. Şaristan de heqê resî yê wendekaran 3 lîra û heqê resî yo normal zî 4.50 lîra yo.