Çewlîg de bi tewrbîyayîşê Hemsereka Pêroyî ya HDPyî Pervîne Buldan û Hemserekê Pêroyî yê DBPyî Keskîn Bayindir, Wekîlê Amedî Hîşyar Ozsoy, Wekîlê Dêrsimî Alîcan Onlu, Wekîlê Çewlîgî Erdal Aydemîr û endamanê Meclîsê Partîyî têhetameyîşê şarî ame kerdene.

Têhetameyîş de verî hemserekanê HDPyî yê Çewlîgî Saadete Firat û Hasan Soysalî qisey kerd. Hemserekan semedê tewrbîyayîşî şarî rê spas kerd û sozê têkoşînî newê kerd.

Hemserekê Pêroyî yê DBPyî Keskîn Bayindirî qiseykerdişê xo de nê vatî: ''Şarê kurdî her ca de yo. Îqtîdarê AKP-MHPyî zilmê şaran keno. Îqtîdar pê hêrişan wazeno îradeyê şarê ma bişikno. Ma ewro kuçe-kuçe, taxe- taxe gêrenê û vînenê ke şarê ma têkoşînê tarîxî dano. Coka ma vanê ke na seserre do biba seserra kurdan. Zîndanan de zî xoverdayîşo pîl yeno rayraberdene. Tepişteyî vera tecrîdê Îmraliyî bi aşman o grevê vêşanîye de yê. Ma demêkê tarîxî ra ravêrenê. Şarê kurdî rixmê heme hêrişan çok nêdano. Kurdî do pê têkoşînî tecrîd bişiknê. Şarê kurdî çareserî wazeno. O xelisnayîş zî şiknayîşê tecrîdî yo. Birêz Ocalanî mabênê serranê 2013-2015î çareserî ramojna. Aye ra tecrîd û înkarê caverdê. Şarê ma çareserî wazeno.''

Hemsereka Pêroyî ya HDPyî Pervîne Buldan kurdkî û tirkî şar selam kerd û seba ke Çewlîg de ya keyfweşîya xo ard ziwan. Buldane bale ante serê demê muzakeran ser û vat: ''Hukmatê AKPyî masa qeldaye. Semedê haştîye û azadîye çikê destê ma ra ame ma kerd. Ma zaf kede daye, cehd kerd ke meselaya kurdî bêro çareserkerdene la înan qiymetê nê prosesî nêzana û pê qeldayîşê masa reyna verê pêkewtişan akerd.

Ewro têna Îmrali de nê, têna serê Birêz Abdullah Ocalanî de nê hinî tecrîd her cayê welatî de yo. Hêrişê nîjadperestî zêdîyenê û felaketê tebbî qewimîyenê. Îqtîdar zî têna hêriş û krîzan seyr keno. Îqtîdar bê dişmenîya vera kurdan çîk nêzano. Semedê şaran çîyêk nêkeno,têna çîyê ke vera şaran ê înan rê eleqedar beno. Qedayê xo dayo HDPyî. Şima do çirey meeşkê HDPyî biqefilnê.

Partîyanê ke parlamento de polîtîkayanê şerî rê vat ya, ganî nê tewirê xo reyna çiman ra ravêrnê. Şima tezkere qebul kerd, xora welatanê ke tede şer vejîya şar tira remeno yeno. Wezîfeyê ma paştdayîşê ê macîran o derbkerdiş nêyo.  Wezîfeyê ma piştişê derbano. Ma vera zîhnîyetê hêrişkar ê îqtîdarî yê. Konya de 7 kurdî ameyî qetilkerdene. Kurdî tim dej ancenê la dejo tewr pîl wextê îqtîdarê AKPyî de dî. Wextê AKPyî bîyo de. Vîjnayîşî de o do şiro. Xora ê zî zanê ke demê xo yê peyênî de yê. Îqtîdarê ke meselaya kurdî çareser nêkenê bi xo qedîyenê.''