Sîyasetmedar, hunermend, roşnvîr û alîmanê çewlîgijan ê surgunkerdeyan bi eşkerayîyêka nuştekîye pare kerd ke ê do weçînayîşan de paştî bidê namzedanê Partîya Çep a Keske.

Eşkerayîye wina ya:

''Seba ke erjê texrînkerdeyî yê Çewlîgî newe ra awan bibê, zazakî û kurmanckî bibê ziwanê perwerdeyî, heywankarîye-ziret bêrê averkerdene, daristan û xozaya ma bipawîyê, azadîya fikran bêra caardene ma venga şarê xo danê ke raya xo bidê namzedanê wekîlîye yê Partîya Çep a Keske yê Çewlîgî Cemîle Turhalli Balsak, Omer Faruk Hulaku û Faruk Arisî û weçînayîşanê serekkomarîye de zî raya xo bidê Kemal Kiliçdarogluyî.

Çewlîg şaristanê Şêx Şerîf, Şêx Abdullahan o, şaristanê Xanima Telllî, mîranê Çebaxçur û şêxanê Çanî yo. Çewlîg pê gelî, çem û koyanê xo cografyayêka zengînî ya la mehkumê projeyanê talanî yê îqtîdarî bîyo. Şarê ma zî mehkumê xizanî, bekarî û felaketan bîyo. Ciwanê ma erdê xo ra abirîyayê.

Seba ke ma wayîrê ziwan, kultur û bawerîya xo vejîyê, verê polîtîkayanê cîyakeran bigêrê, xozaya xo bipawê û xizanîye ra bixelisê qerar destê şima de yo. Partîya Çep a Keske ewladê ercîyayeyî sey namzedan vetî vernîya şima û şima ra yew şens wazena. Ma wazenê ke şima nê şensî bidê ci. Erkê ma yo tarîxî û exlaqî yo ke ma domananê xo rê welatêkê aram, haştîperwer û muferehî bidê. Ma tewrê xebatanê Partîya Çep a Keske bidê, der û dorê xo îqna bikerê, raya xo bidê û erkê xo û mesuldarîya xo bîyarê ca. Rojê rindî û sibayê rindî destê şima de yê.''