Endamê Heyetê Rayberdişê Merkezî yê HDPyî avûkat Cengîz Çîçek pêvînayîşê telefonî yê Abdullah Ocalanî ANFyî rê ercna.

Cengîz Çîçekî ard ziwan ke serebûtanê Garê, dewaya qefilnayîşê HDPyî, betalkerdişê Peymana Îstanbulî û tepiştişê Gergerlîogluyî mojnenê ke Meclîs zî tede pê tasfîyekerdişê sîyaset û sîstemê demokratîkî xîret yeno kerdene ke rejîmo newe yê modelê 2023î bêro awankerdene.

Çîçekî vat: ''Rejîmê tirk-îslamî de înkar û qirkerdiş tim bîyî bara kurdan. Awankerê rejîmî gamanê xo seba tasfîyeya têkoşînê kurdan erzenê coka tecrîd kenê mutlaq. ganî nêzdîbîyayîşê vera Abdullah Ocalanî pê kodanê rejîmê neweyî bêro ercnayene. Hem tehlukeyê vera kurdan û Birêz Ocalanî zêdîya hem zî vera rejîmê faşîstî zemînê awankerdişê îtîfaqê komelkî yê kurdan virazîya. Karo serek oyo ke no îrade senî bêro vurnayene gamanê sîyasîyan û komelkîyan.''

Cengîz Çîçekî bale ante qiseykerdişê telefonî yê Abdullah Ocalanî ser û vat: ''Seba ke verê hesasîyetê şarî bêro girewtene û grevê vêşanîye biqedo destûr dîya pêvînayîşê telefonî. Waştiş û armancê îqtîdarî bi ke verê serewedaritişê komelkî yê seba Ocalanî bigêro. Coka pêvînayîşê telefonî hende kilm bi. No zî mojneno ke huqûqê korsanan ê vera Abdullah Ocalanî dewam keno.''

Çîçekî vateyê 'Şima wina şaşî kenê dewlete şaşî kena' yê Rayberê Şarê Kurdî Abdullah Ocalanî ercnayî û vat: ''Oacalan nê mesajî dano ke êyê ke bi hawayêkê sivikî û bingeyê menfaatanê rojaneyan ser o nêzdîyê na meseleya tarîxî benê do bin bikewê. Ocalanî roja verêne ra nata bale ante na mesele ser.''

Cengîz Çîçekî ard ziwan ke seba astengkerdişê awankerdişê rejîmê neweyî û seba pîlkerdişê alternatîfê komara demokratîke ganî ê her wextî ra zêdêr afernayox û çêr bibê. Çîçekî vat: ''Vera polîtîkaya şerî pê têkoşînê haştîya komelkî yê Birêz Ocalanî  pê têkoşînê vera faşîzmî ganî hemleyêka sîyasî bêra kerdene. Ganî muxalîfê AKP-MHPyî vera faşîzmî rayîrêk peyda bikerê yan zî akerê. Naye ra ber alternatîf çin o.''