Wekîlê HEDEPî yê Wanî Sînan Çîftyurekî 17ê teşrîna peyêne de kuçeyêkê Amedî de hetê kesêkî ra bi çeke amebi tehdîtkerdene. Çîftyurekî derheqê serebûtî de ANFyî rê qisey kerd.  

Çîftyurekî wina qala serebûtî kerde: ''Kuçeyê Akkoyunluyî yê Amedî de embazê mi verê mi de şîyêne. O çax kesêk vejîya verê mi ke yeleg xo rê kerdbî. Ey yelegê xo akerd, çeka xo mojnaye mi. 3-4 sanîyeyî o ewnîya mi ra. Mi venga embazê xo kerd, mi ci rê vat ke 'ey çeke mojnaye mi ra.' Ey kesî ez teqîb kerda, sewbîna çara zanayêne ke a hele ez uca ra derbaz bena? Çira mi rê çeke ameye mojnayene? Çunke HEDEP meseleya kurdan û Kurdîstanî beno rojdemê MEclîsî. 

Xora dewlete se serrî yo çeke mojnena kurdan ra, kurdan tehdît kena. Koçgirî ra heta Dêrsimî û Newala Qesaban, Faîk Bucakî ra heta Tahîr Elçîyî kurdî ameyî qetilkerdene. Ma Meclîsî sey warê çareserîye vînenê. Eke şima vanê meclîs çin o, o çax cayêkê bînî bimojnê ra. Seba çareserîya meseleya kurdan verê ma de di rayîrî est ê; Meclîs û nêrazîbîyayîşo demokratîk. Ma gef û tedayan ra nêtersenê.''

Çîftyurekî ard ziwan ke derheqê meseleya kurdan û Kurdîstanî de ê xîret kenê ke zemînê demokratîkî de sîyaset bikerê û vat: ''Ma no Meclîs de vatbi; eke çareserîyêka haştîyane yena waştene ganî tecrîdê vera Birêz Ocalanî bêro wedaritene. Ocalan eşkeno çareserî û haştîye bîyaro. La ê nêwazenê. Ma veng danê ke herinda tehdîtan de wa goş bêro dayene waştişanê kurdan ser.''