Menganê peyênan de 5 wendekaranê zanîngehî qesawetê serê ameyoxê xo, deyn û bêhevîtîye ra xo kişt. 6 menganê verênan ê 2023yî de bi des hezaran ciwanî zî heman qesawetan ra neçare mendî ke verê xo bidê welatanê cîyayan. Hemvervatoxa Meclîsê Ciwanan ê HEDEPî Eda Îbrahîmoglu derheqê rewşe û têkoşînê ciwanan de ANFyî rê qisey kerd.

Eda da zanayene ke dewlete xîret kena ke ciwanan bikera yew tîpî û vat: ''Sere de dezgehê perwerdeyî pêro dezgehê dewlete bi nê ferasetî têgêrenê. AKP seba ke ciwanan bigêro binê xizmetê sîstemî têgêreno.  Kurdîstan de bi nê armancî polîtîkayê şerê taybetî yenê caardene. Her taxe de karê fuhuş, narkotîk û ajankerdişî est ê. Hetê bînî ra cinîyê ciwanî raştê tacîz û tecawuzan yenê. Ciwanê Tirkîya zî raştê ferzkerdişê nê sîstemê perwerdeyî yenê.''

Eda îfade kerd ke hêzê tewr pîlî yê geşkerdişê têkoşînî ciwanî yê û vat: ''Mîrasê neslê 68î gandar o û hîs û hêvîya ciwanan zêdîneno. Eqsê îdîayan Tirkîya û Kurîstan de rêxistinê ciwanan hema zî xurtêr ê.''

Eda pare kerd ke meseleyê nikayênî meseleyê îqtîdarî ra zêdeyêr meseleyê sîstemî yê. Eda vat: ''Bi vurnayîşê îqtîdarî meseleyî çareser nêbenê. Çareserîya ke sîstemî rexne nêkena do mende nêba coka ganî îdeolojîya dewlete ra cîyabîyayîş lazim o. Ganî ciwanî xo na rewşe ra  bixelisnê û îdeolojîya Kemalîzmî ra zî bixelisnê. Heta ke kolonyalîzmê vera kurdan nêqedîyo demokrasî û azadî do nêrê. Nê esasî ser o ganî ciwanî erk û mesuldarîyanê xo bikerê.''