Merkezê Pêroyî yê Komeleya Heqanê Merdiman (ÎHD) Roporê ''Çimdarîya Heqan a Zîndananê Tirkîya'' merkezê xo yê pêroyî de bi kombîyayîşê çapemenîye eşkera kerd. Hemsereka Pêroyî ya ÎHDyî Erene Keskîn zî tewrê kombîyayîşî bîye. Rapor hetê Endama Heyetê Pêroyî ya Merkezê Rayberdişî yê ÎHDyî Nuraye Çevîrmen ra ame parekerdene.

Rapor de wina ame vatene: ''2022 yî de Tirkîya de 22 zîndanî ameyî akerdene û hûmara zîndan bîye 407 ke kapasîteyê înan 296 hezar o.  Emser zî yeno plankerdene ke 22 zîndanî bêrê akerdene.  360 hezar 772 kesî zîndan de yê. Zafê înan zîndananê qefilnayeyan de yê. 2 hezar û 572 kesî doman ê û 6 hezar û 223 kesî 65 serran ra cor ê.

58 bajaran de 153 hîrê zîndana ra muracatî ameyî kerdene. Çarçewaya nê muracatan de tewr tay 10  hezar û 789 binpaykerdişê heqan ameyî tesbîtkerdene. Tewr tay 2 hezar û 439 binpaykerdişê heqê weşîye ameyî kerdene. tepişteyê nêweşî bi qeraranê sîyasîyan nînê veradayene û hewcedarîyê înan nînê caardene. Tepişteyê astengdarî hucreyan de yenê tepiştene.

Serrêke de 81 tepişteyan dinyaya xo bedilnaye. Nê tepişteyan ra 6 kesî bertengê mergî de ameyî veradayene û badê tehlîye dinyaya xo bedilnaye. 25ê tepişteyî bi hewayêkê şikdarî merdî û sebebê mergê yew tepişteyî nêame eşkerakerdene. Ame îdîakerdene ke 19 tepişteyan xo kişto ke di yê înan doman bê.

Derbkerdiş, tehdît û îşkence bi hewayêkê sîstematîkî yenê kerdene. Cezayê dîsîplînî zêdîyayî. Zereyê serre de tewr tay heqê veradayîşî yê 105 tepişteyan ame astengkerdene. Binpaykerdişê heqan tewr zaf zîndanê tîpê F û tîpê Syî de yenê kerdene. Tecrîdê Îmraliyî heme zîndanan de vila beno.Vera nê binpaykerdişanê heqan tewr tay 33 zîndanan de tewr tay 234 tepişteyan çalakîya grevê vêşanîye kerd. Sebebê na rewşe îdarekarê welatî yê.

Rayberê Şarê Kurdî Abdullah Ocalan  7ê tebaxa 2019î ra nata avûkatanê xo reyde pêvînayîş nêkeno û 29 aşmî yo tira qet xeberêke nîna girewtene. Muracatê pêvînayîşî yê keye û avûkatan bêcewab yenê verdayene. Tewr peynî 18ê temmuze de cezaya dîsîplînî ya bine ameye dayene û reyna verê pêvînîyaşî ame girewtene.''