Ongurî ard ziwan nê demanê peyênan de zindananê Çukurova de binpaykerdişê heqan bîyê vêşî û xeylî hayîdarîyê cidî resenê înan. Ongurî qiseykerdişê xo de qalê binpaykerdişanê heqan ê zindananê Tarsûs, Osmanîye û Kurkçîlerî kerdî.

MURACAATÊ CIDÎ Û VÊŞÎYÎ

Ongurê ard ziwan ke derheqê binpaykerdişê heqan ê zindananê Çukurova de bi hawayêkê cidî û vêşîyî muracaatî ameyê kerdene. Ongurî vat: “Çi komîsyonê xo dir çi zî embazê ma yê avûkatan dir pîya seva tespîtê halî û halkerdişê probleman ma xebate kenê. Ma raporan amade kenê ke şar pê bihesîyo û sazîyê eleqedarî bikewê mîyanê têgêrayîşî.”

BICAARDIŞÊ TEBERÊ ANORÊ MERDIMÎ

Ongurî ard ziwan ke bitaybetî zî dimayê îlankerdişê OHALî ra zindanan de binpaykerdişê heqan bîyê vêşî û wina dewam kerd: “Bicaardişê ke teberê anorê merdimî de yê yenê dewamkerdene. Vernî ro heqê tedawî yê tepişteyanê nêweşan yeno girewtene. Nêweşê xeylî giranî yê ke ganî nêweşxaneyêkê bêkemasî de bêrê tedawîkerdene tenya bi tedawîya dermanan zindanan de yenê tepiştene. Mesela ganî tepişteyî hewte ra 10 saetî vejîyê cayê hewagirewtişî la tenya 10 rojan ra 1 saet yenê vetene.”

WAŞTIŞÎ YENÊ PEYGOŞKERDENE

Ongurî peynîya qiseykerdişê xo de ard ziwan ke ê qiseykerdişê înan dozgerê zindanî yê herême dir dewam keno û vat: “Seva ke binpaykerdişê heqan biqedîyê ma cehd kenê. Bitaybetî nê wextê peyênî de problemê tepişteyan bîyo problemêko cidî. Meseleyê tepişteyanê nêweşan meseleyêk ke bibo bazaro sîyasî nêyo, meseleyêko wucdanî û yê merdimayî yo.”