Roniştişê dewaya ke kiştox Onur Gencenî yo ke 17ê hezîrane de Denîze Poryraz banê HDPyî yê Îzmîrî de qetil kerd,  Mehkemeya Girane ya 6. ya Îzmîrî de ameye kerdene. Roniştişo bîn 29ê nîsane rê ame peydeeştene.

Kiştox Gencerî ard ziwan ke ê perwerdeyê çeke dîyo û polîgonan de xo aver berdo û vat: ''Mi tifing semedê keyfî girewt la dafinçe semedê qesasî mi girewt.  Heta 16ê hezîrane. Qesas amebi yew nûqta ke ez hinî nêeşkayêne vinderî. A şewe ez nêşîya hewna. Saete 10.30 de ez pê taksî ameya verê bîna. Ver bi 11.00î ez kewta zere. Eke ez 5 deqeyî verî biameyêne cînayêtêko danîha gonîn do biameyêne kerddene.'' Naye ser heyete ra vengê nêrazîbîyayîşî bîyî berz.  Serekê mehkeme herinda kiştoxî vera şarî nêrazîbîyayîş mojna. Gencerî Murat Çepnî zî tehdît kerd.

Babîyê Denîze Poyraz Abdullîlah Poyraz ke kurdkî qisey kerd vat: ''No şexs DAÎŞî ra wetêr o. Yew kiştox o. Ez têna semedê Denîze nê semedê heme cinîyan edalet wazena. No kiştox şîyo Minbic de perwerde dîyo û bi nê perwerdeyî Denîze şehîde kerd. Denîze şehîda ma pêrun a. Polîsan kiştoxî ra vatêne 'nameyê to çîyo birayê mi'. No paştdayîşê qirkeridşî yo. Wa mehkeme tesbît bikero û ceza bido înan.''

Dima ra dayîke Fehîme Poyraz qisey kerd. Dayîke Poyraz vat: ''Zerrîya mi vêşaye, wa hînî zerrîya çewî meveşê. Hûma mele adirê zerrîya ma bikerê keyeyê kiştoxî. Ez pê dermanî payra ya, şewe nêşina hewna.  Verî gule nayo kênaya min a. Dima ra pê kardî ci rê îşkence kerdo. O terorîst bi xo yo. Ma sey tim hetê haştîye de yê. Ma do dewaya xo cameverdê. Ma şer nêwezanê. Wa dayîkî hinî mebermê. Ganî verî înanê ke kiştox perwerde kerdo bêrê cezakerdene. Kiştox ça ra paştî geno ke wina rehet qisey keno? Wa heq û huqûq bêrê ca.''

Dima ra sey şahîdî ramitoxê taksî İbiş Işık ame goştarîkerdene. Avûkatan vat vatişê Işikî yewbînî nêtepişenî. Avûkata HDPyî Turkane Aslan Karagaç ard ziwan ke cigêrayîşê cayê qewimîyayîşî bi hasasîyetî nêame kerdene û vat ê  şik kenê ke kaniti ameyî nimitene.  Heyetê mehkeme qerar girewt ke asayîşî ra wa heme dîmen û fotografê herinda qewimîyayîşî bêrê şawitene û hetê merdimanê zanayan ra bêrê cigêrayene. Heyetê qererê dewamê tepiştişê kiştox Onur Gencerî da û roniştişo bîn 29ê nîsana 2022yî rê peyde eşt.