Ame îdîakerdene ke esteyê ke dewa Arabukî ya qezaya Curnê Reşî ya Riha de ameybî dîyene, aîdê ê kesan ê ke serranê 90an de hetê ronayoxê JÎTEMî Arîf Doganî ra ameybî qetilkerdene.

Arîf Doganî serranê 1990an de dewanê qezayanê Curnê Reşî û Sêwrege de beşdarê tehqîqatan bi û merdimî kiştî. Nê herêman de hema zî esteyê ke ekîba Sedat Bucakî zî tira mesuldar a, yenê dîyenê. Tewr peyên 7ê hezîrana 2022yî de dewa Arabûkî de ke girêdayê eşîra Bucakan bîya, axpînêke de esteyê merdiman ameybî dîyene. Wayîrê axpîne 21ê temmuze de muracatê Walîtîya Riha kerdbi û cigêrayîşê bînî de 9 parçeyê esteyî ameybî dîyene. Seba ke esteyî taxa aîdê qoricîyanê eşîra Bucakî de ameyê dîyene yeno îdîakerdene ke serranê 90an de no ca sey merkezê JÎTEMî şuxilîyayo. Keyeyê ke merdimê înan cînayetanê 'faîlî meçhûlî' de ameybî qetilkerdene, na xebere ser o têgêrayî.

Serekê ÎHDyî yê Riha Mustafa Vedayî pare kerdbi ke dosyaya raporî de yeno vatene ke esteyê aîdê camêrdî yê. Vedayî da zanayene ke keyeyêkî ra nimûneya gonîye ameya girewtene û beno ke esteyî aîdê Faîk Kevcîyî bibê.

Goreyê vateyanê şahîdan ronayoxê JÎTEMî Arîf Dogan serranê 90an de beşdarê tehqîqatan bîyo û merdimî kiştê. Hetê bînî ra nê cînayetan de Sedat Bucak zî wayîrê rolêkê pîlî yo.