Erdlerzê 6ê sibate de tesîrê 13.5 mîlyon merdiman kerd. Goreyê doneyanê fermîyan erdlerz de 50 hezar û 783 kesan dinyaya xo bedilnaye. Qezaya Bazarcixî ya Mereşî zî ê cayan ra yew a ke erdlerz de zerarêko pîl dîyo. Bazarcixa ke zafêrê nufusê ci elewî yê, zerrîwazî kenê ke birînanê ci weş bikerê. 

Koordînasyonê Weçînayîşî yê Bazarcixî yê Partîya Çep a Keske rewşa qeza ANFyî rê ercnaye.

Koordînasyonî da zanayene ke polîtîkayanê rantî yê îqtîdarê AKP-MHPyî ra felaketêko hende pîl qewimîyayo. Koordînasyonî dîyar kerd ke karê cigêrayîşî, xelisnayîşî û hetkarîye yê erdlerzî hetê rêxistinanê komelê sivîlî, partîyan û zerrîwazan ra ameyê kerdene û vat: ''Şarê ma yê dîaspora destekêko madî-manewî yo xurt da. Taxa Hasankocayî de qeymeqamîye dest na hetkarîya ke komeleya elewîyan şawitbî. Bazarcix de hêrsê şarî yê vera îqtîdarî do weçînayîşan de eşkera bibo.''

Koordînasyonî bale ante ser ke erdlerzî ra dima xeylêk kesan qeza ra koç kerdo. Koordînasyonî ard ziwan ke polîtîkaya vengkerdişê herême erdlerzî ra dima zî ameye caardene û îqtîdar keno ke bi firsendê erdlerzî demografîya herême newe ra dîzayn bikero. Koordînasyonî vat: ''Îqtîdar keno ke dewan de nufusê tirkanê misilmanan zêde bikero û bi hetkarîyan merdiman teşwîq keno ke koçê nê herêman bikerê.''

Koordînasyonî vist vîrî ke erdlerzî hema 3 mengî xo pey de nêverdabî YSKyî îlan kerdo ke seba dîyarkerdişê cayê raydayîşî 17ê adare tarîxo peyên o. Koordînasyonî îfade kerd ke AKP-MHP keno ke erdlerzî xo rê bikero firsend û tira fayde bikero. Koordînasyonî vat: ''KAP bi dek û dolaban keno ke waranê vengkerdeyan de weçînitoxanê xo bimojnê yanî rayanê sexteyan bişuxilnê. Îqtîdar tîya de bi kolîyanê Kizilayî propagandaya weçînayîşî keno. Îqtîdar keno ke mexdûrîyetê merdiman ra fayde bikero. La merdimî do nê weçînayîşan de bi rayanê xo tewirê xo îqtîdarî rê bimojnê.''