Zîndanê Xarpêtî de destpêkî ra nata vera tepişteyan teda, îşkence, şîdet û binpaykerdişê heqan yenê kerdene. Wekîlê HDPyî yê Dêrsimî Alîcan Onluyî pê waştişname û vernîyazê persî babete berde rojdemê Meclîsî.

Onluyî vist vîrî ke rixmo ke serranê peyênan de derheqê kerdişanê xiraban ê Zîndanê Xarpêtî de hetê HDPyî ra xeylêk waştişnameyî ameyî dayene Komîsyonê Cigêrayîşê Heqanê Merdiman ê TBMMyî la reyna zî derheqê îdareyê zîndanî de tehqîqatêk nêdîya destpêkerdene.

Onluyî vat: ''Tepişteyanê sîyasîyan keyeyanê xo rê vat ke vera koxuşan teda yena kerdene, gardîyanî bi nîzamî pê copan, daran û kolîyan erzenê koxuşan ser û tepişteyan derb kenê. Tepişteyan îfade kerd ke nê gardîyanî maske nêdanê rîyê xo, hacetanê tepişteyan zît kenê, tepişteyan rê heqaret kenê û tepişteyanê ke vera gardîyanan vejîyenê dekenê hucreyan.''

Alîcan Onluyî derheqê babete de seba cewabanê ci Wezîrê Edaletî Abdulhamît Gulî rê nê persî persayî:

-Wezîrê Edaletî vera nê kerdişanê Zîndanê Xarpêtî heta key do bêveng bimano?

-Çira derheqê îdareyê zîndanî de tehqîqatêk nêdîyeno destpêkerdene? Şima zanenê ke pê pawitişê îşkencekeran şima zî benê hemkarê nê sûcan?

-Derheqê gardîyan û îdareyê zîndanî de heta nika muameleyêk ame kerdene?