Kesanê ke Erdlerzê 6ê Sibate de dinyaya xo bedilnabî, Îskenderun de ê ameyî yadkerdene. Şar serkêşîya Înîsîyatîfê 6ê Sibate de bi meşaleyan rayîr a şi. 

Mexdûranê erdlerzî fotografê merdimanê ke erdlerz de dinyaya xo bedilnabî akerdî û sloganê sey ''AKP do hesab bido'', ''Erdlerzî xo vîr a mekerê, medê vîrakerdene'', ''Ma do nêşorê, tîya de yê'', ''Ma rihna nehna hon'' (Ma nêşorê, tîya de yê) vatî.

Rayraşîyayîşî ra dima mexdûranê erdlerzî findî tavistî û fotografê domananê vîndîbîyayeyan, qerenfîl verdayî. 

Bîrgule Gudena ke teyna yew domanê ci est bibi û o zî erdlerz de merdbi, merasîm de qisey kerd û vat: ''Nê felaketî de Îskenderun de 3 hezar û 109 kesan dinyaya xo bedilnaye. Polîtîkayanê hukmatî verê nê felaketî akerd. Ma do mexdûranê erdlerzî reyde paştdayîşî xurt bikerê.''

Qiseykerdişan ra dima şar derbazê xeyma paştdayîşî bi.