Îsyan Kayayî nameyê tepişteyanê PKK û PAJKî ser o eşkerayîye daye û pare kerd ke pê qanûnê neweyî dewlete wazena ke tepişteyan rê poşmanî û îtîrafkerî ferz bikerê.

Eşkerayîye wina ya: ''Înan caardişêko berqanûn û tewş vist dewre. Eşkeraa yo ke ma pê têkoşînêk eşkenê vera nê hêrişî bigêrê. Xora ma sey şar û têgêrayîşê kurdan na babate de wayîrê xeylêk tecrubeyan ê. Xora QTT (Qanûnê Têkoşînê vera Terorî) ra semed tepişteyanê sîyasîyan rê neheqîye û cîyakerîye yenê kerdene. No qanûno peyên QTTyî ra zî wetêr o. Pê nê qanûnî doktor, mamosta, gardîyan, teknîsten û mudiran ra heyetêk ame awankerdene ke yew eleqeyê înan pê huqûqî çin o. No heyet mehkemeyan ra zêdêr wayîrê selahîyetî yo û eşkeno bire  bido ke tepişteyê ke înfazê ci qedîyayî, vera bidîyê yan nê.

Ma seba ke fikr û bawerîyanê xo ra poşman nîyê, îtîrafker nîyê bi serran o zîndan de yê. Ê pê gefê 'zîndanî ra nêvetişî' ma rê poşmanî û îtîrafkerî ferz kenê.  Pê persanê 'Derheqê Abdullah Ocalanî de çi fikirîyenî?, Eke ti vejîyî teber do se bikerî, ti derheqê PKKyî de çi fikirîyenî?' nê kerdişî ma rê yenê ferzkerdene. Tay zîndanan de embazî ma pê bahaneya 'tay kitabî wendê' yan zî 'zaf kitabî wendê' , semedo ke tewrê kurdî bîuî yan zî nêbîyî vera nêdîyayê. Keso ke 29 serrî yo rêxistinî ra dûrî bîyo, bi sereyê xo ciwîyeno semedo ke seba PKKyî wayîrê hîsan o vera nêdîyayo.

Tay zîndanan de seba nê kerdişan odayê tarî virazîyayî. Ge ge serdozgerî zî tewrê nê cipêrsayîşan benê. Nê kerdişî vera merdimîye yê. Kesê ke wayîrê hîşmendî û îradeyî yê nê keridşan ganî qebul nêkerê. Ma qetî cewab nêdanê nê persanê faşîstan û ma nînan meşrû nêvînenê. Pêro têkilîyê ma, pêvînayîşê ma her wextî ra zêdêr yenê kontrolkerdene.Ê wazenê hêvîya ma, tersê ma, ameyoxê ma, waştişê ma bimusê û pê gefan ma rê poşmanî û îtîrafkerî ferz bikerê. Ma do na bêrûmetî qebul nêkerê.

Kesê rûmetînî wa cewan nêdê nê persan û nînan tesdîq mekerê. Meşaleya Mazlûm, Xeyrî û Kemalan rayîrê ma kena roşnî. Înan binê faşîzmê 12ê êlule de qetî zîndanê Amedî de têkoşînê partî, rayberî û azadîya şarî ra fek vera nêdê. Ma teqîbker û şagîrtê nê çêran ê. Ma do qetî nêverdê ke versîya faşîzmî bikewa erjanê ma ser. Ma do xoverdayîşê xo, rûmet û destkewteyanê xo qetî pêşkêş nêkerê. Ma do nê ferzkerdişê poşmanî û îtîrafkerî qetî tesdîq mekerê. Ma venga pêro dormeyanê rûmetînan danê ke wayîrê edaletî, rûmetê merdimîye vejîyê. Ma pê qerardar ê ke tewirê xo berz bikerê û hêrişê faşîzmî pûç bikerê.''