Şewatê Çinar û Şemrexî hewteyêk xo dima verda la hema herême de tesîrê ci û şînê şarî dewam keno. Dewan de hem problemê ceyranî hem zî problemê awe est o.

Cinîyê ke dewa Tobînî de ciwîyenî qala qewimîyayîşanê badê şewatî kerd, bale ante problemê awe û ceyranî ser.

Fikrîye Çelebî ard ziwan ke şewatî ra nata rixmê na felakete awe nêdîyaye dewe û vat: ''Bi rojan o awe çîn a, ceyran çîn o. Mengêka awa ma birnenê. No heq o? Mîyanê heme herra ma de şirîtê ceyranî est ê. Ma perûne dî ke şewat înan ra vejîya. Ma pê çimanê xo dî ke têlanê ceyranî ra çîqe vejîyaye. Wa sûcî meerzê ma ser. Hende ke ceyranê biryeno heme malzemeyê ma yê biceyranî xeripîyayî. Awa xirabine ra ma nêweş kewnê. Wextê weçînayîşî de yenê semedê rayan gêrenê la dima ra ma xo vîra kenê. Wa ewro ra tepîya çew ma ra raye mewazo. Wa verî ma nê zulmî ra bixelisnê.''

Fatma Bugdayci zî ard ziwan ke a teberê dewe de ciwîyena û badê şewatî ameya û vat ap û dezayê ci şewat de merdî. Bugdayci nê vatî: ''Badê şewatî merdimanê ma ma ra hetkarî waşte. Ma zî xevere da heme nasanê xo û ma cade ameyî.  Ma resaye tîya hema ambulans û îtfaîye nêameybî. Kênaya mi Antalya ra xebere daye bî ambulans û îtfaîye, înan kênaya mi rê vato 'ma se bikerê, ma şo û biveşê.' Eke ê biney lez biameynî belka ap û dezayê mi hema weş bê. Şaro ke semedê hetkarîye ame hetê leşkeran ra ame astengkerdene. Leşkeran rayîr girewt nêverda çew bêro.''

Aytene Aktay zî ard ziwan bi serran o dewe de problemê ceyran û awe est o û wina qisey kerd: ''Seba ke ceyran tim biryeno malzemeyê ceyranî xeripyenê. Roja şewatî zî ceyran birna û heta şanî veranêda. Dima nişka vera da û cade têlanê ceyranî ra çîqî perayî. A şewe zaf hewa zî bibi. Seba ke zaf hewa ameyêne şewat cade bi gir û vila bi, panc deqayan de resa di dewanê bînan. Îtfaîye erey ame, leşkeran rayîr girewt destûr nêda bêro zereyê dewe. Înan cara destûr nêda.Waşt ma tîya bimirê  şirê. Ciwanê ma tîya perîşan bîyî. Şaro ke semedê hetkarîye ame destûr înan zî nêda. Şînê ma dewam keno. Psîkolojîya tutanê ma xeripyaye. Tayînan vato 'xo bîyo.' Seba ke ma kurd ê, ganî ma bivêşê bimirê? Ma 15 kesî defin kerdî, qet wîjdanê înan nêvêşeno.Qey çewî çîyêk nêkerd, nêkeno?''

Husnîye Çelebî zî nê vatî: ''Mêrdeyê mi mixtar o, ma zaf hol zanê.  Bi serran o ma semedê ceyranî waştişname şawenê la çew eleqedar nêbeno. Têna weçînayîş de ma yenê vîrê înan. Dima ra ma xo vîra kenê. Helîkopter serê sibayî bado ke her çî qedîya, ame. Eke şewe biamêyene o şewat rewî ra ameyêne hewnakerdene û hende kesî nêmerdêne. Ma heqê xo helal nêkenê. Tim awe û ceyran birnenê. Ma zî guneyo. Ma têna ganê xo vînî nêkerdî, zaf ziraro bînî zî est o. Ma pê citkarîy û heywankarîye îdareyê xo kenê. Ne citkarî mende ne zî heywankarîye.''