Bi taybetî serranê peyênan de Amed de mîyanê ciwanan de şuxilanayîşê madeyanê narkotîkî zêdîyeno. Hemserekê HEDEPî yê Amedî Abbas Şahînî derheqê babete de ANFyî rê qisey kerd û pare kerd ke madeyê narkotîkî qestî ra şaristananê kurdan de yenê vilakerdene.

Şahînî da zanayene ke bi taybetî 2015 ra dima şaristananê kurdan de meseleya narkotîke giran bîya û vat: ''No tesaduf nîyo. Dewlete qestî ra ciwananê kurdan musnena madeyanê narkotîkî û bi nê hawayî zî ciwanan sîyaset, tewirê sîyasîyî û têgêrayîşê azadîye ra dûrî visnena. Ewro Amed de domanê 8 serrî zî heyf ke madeyanê narkotîkî şuxilnenê. Dewlete vera na mesele çîyêkî nêkena. Bi madeyanê narkotîkî yeno waştene ke ciwanî yanî komel bêîrade bibê.''

Şahînî dîyar kerd ke seba ke verê vilabîyayîşê madeyanê narkotîkî bigêrê înan dest pê karanê girîngan kerdo û vat: ''Sey partîye û şarî ma mîyanê têkoşînêkê pîlî deyê. Ma do wayîrê kuçeyanê xo, ciwananê xo vejîyê. Wexto ke 4 hezar dewî ameybî xalîkerdene û 800 hezar merdimî neçarîye ra ameybî şaristanî şar payan ser de mend û bi polîtîk. Şar îşkence û qirkerdişan ra dima zî wayîrê nasnameyê xo vejîya. Ma do tim est bê. Vera bazirgananê narkotîkî şarê xo reyde ma do têkoşîn bikerê.''