Semedê Narîne Guran a ke Rezanê Amedî ameye qetilkerdene xeylêk bajranê Kurdîstanî û Tirkîya de çalakîyî ameyî kerdene. Çalakîyan de sloganê sey “Jin jiyan azadî” û Kuştina zarokan politîk e” ameyî vatene.

Riha, Mêrdîn, Dêrsim,Dîlok,Êlih,Adana, Îzmîr, Artvin,Aydin û xeylêk bajaran de şaro ke vejîya meydanan vera qetilkerdişê Narîne hêrsê xo ard ziwan û vat kiştoxê ci keye-dewlete-terîqet o.

Çalakîya Êlihî de Wekîla DEM Partî Zeynepe Oduncu vist vîrî ke Wekîlê AKPyî Galîp Ensarîogluyî vat, 'Çîyê ke ma zanê est ê la seba ke keye dostê ma yo ma nêeşkenê vajê' û vat: ''Eke domanêka 8 serrî ameya qetilkerdene ti nêeşkenê bêveng bimanê. Ganî Ensarîoglu dewaya Narîne de çîyo ke zano, vajo. Ganî dozgerî îfadeyê ey bîgêrê. Verî zî domanî ameyî qetilkerdene û serê ci ame girewtene. Nê qetilkerdişî rîyê poltîkaya bêcezayîye ya îqtîdarî ra benê. Herinda tecawuz, tacîz û kiştoxanê domanan de kesê ke fîrkê xo vanê înan tepişenê. Îqtîdar keno ke çîyê ke vera domanan benê ma xo vîra bikerê. Ma do nê xo vîra mekerê û hesabê ci bibpersê.''