Bi qerarê Meclîsê Şaredarîya Dêrsimî, nameyê Şaredarîye yo ke hetê qeyûmî ra sey “Tûncelî” amebi vurnayene, reyna Dêrsim amebi panayene. Labelê serê îtîrazê Walîtîye ra mehkema qerar da ke rayberdişî vindarno. Şaro ke derheqê qerarê Meclîsê Şaredarîye de qisey kerd vat senî şaredarîya verê qeyûmî de nameyê ci Dêrsim bi bi heman hawayî no name ancî bêro şuxulnayene. Şarî vat êyê ka na babete de wayîrê heqê vatişî yê Meclîsê Şaredarîye û şarê Dêrsimî yo û kesanê ke nê nameyî rê îtîraz kenê, înan rê reaksîyon da.

Abdullah Gulerî vat ke qerarê Meclîsî rast o û vat, “Wextê DBP’yî de xora tabela de Dêrsim nûştebi. Qeyûm ame a tabela wedarte. Ma nameyê Tûncelî çi rey qebûl nêkenê. Nameyê “Tûncelî” dimayê qirkerdişê 38’î ra bi zor dîya Dêrsimî ra. Heman wextî de ma wazenê ke no name tena tabelaya Dêrsimî de nê bi temamî bêro îade kerdene.”

Nacîye Temûrlenge zî vat “Ma bi nameyê Dêrsimî ameyî dinya û bîyî pîlî. Ma nameyê Tûncelî nêwazenê. Nameyê Dêrsimî wazenê. Nameyê domanan û koyanê ma zî Dêrsim o. Kam derheqê nê qerarê neweyî de se vano wa vajo ganî ma ya xo bikerê.”

Mehmet Arikanî zî ard vîrî ke nameyê wareyê ci Dêrsim o û vat, “Gama ke ez bi qerarî pêhesîyaya ez zaf kêfweş bîya. La gama ke serekê şaredarîye vat ‘walî se vajo do o bibo’ ez bi nê vatişî zaf dejaya. No senî vatiş o? Serekê şaredarîye îradeyê şarî yo. Ganî seba bicaardişê nê qerarê xo çi destê ci ra bêro bikero. Seba ma Duzgun Baba çende pîroz o, nameyê Dêrsimî zî hende pîroz o. Çi keso ke nameyê Dêrsimî rê dişmen o, dostê ma nêyo.”

Dêrsimije Nesrîn Akça zî vat, “Nameyo rastekên ê nê şaristanî Dêrsim o. Ma bi qerarê Meclîsî kêfweş ê. Çîyo ke ganî biameyêne kerdene zî no bi. Ê çi nameyî binê Dêrsimî ra wa binê, şarî het de nameyê tîyayî Dêrsim o. Ma reaksîyonanê ke yenê dayene qebûl nêkenê. Şarê nê şaristanî qeraranê nê şaristanî dano, êyê ke teber de yê nê!”