Namzedanê Partîya Çep a Keske yê Wanî Gulcane Kaçmaz Sayyîgît û Havîne Kîye bi rayîrê ajansê ma vera operasyonanê qirkerdişê sîyasîyî nêrazîbîyayîşê xo mojna.

Sayyîgîte ard ziwan ke nê operasyonê ke vera sîyasetmedar, hunermend, avûkat û aktîvîstan ameyê kerdene goreyê demokrasî, huqûq û heqanê merdiman nîyê. Sayyîgîte vat: ''Nê operasyonî kenê ke çimê kurdan bitersnê û asayîşê sindoqan wedarnê. Verê cû zî operasyonê winayênî ameybî kerdene la şarê kurdî qetî têkoşînê demokrasî, haştî û azadîye ra fek vera nêda. Vera tepiştiş, destbendkerdiş û sîyasetê tersnayîşî ma xebatanê weçînayîşî ra bêmabên dewam kenê. Ma do 14ê gulane de cewabê nê kerdişan bidê.''

Havîne Kîye bale ante ser ke ê her weçînayîşî de raştê teda, destbendkerdiş û tepiştişî manenê û vat: ''Vera ê kesanê ke seba komelî xebitîyenê hêrişî yenê kerdene. Îqtîdar keno ke pê çimtersnayîşî mudaxeleyê weçînayîşan bikero. Ma zaf reyî operasyonê winayênî dîyî, zaf reyî ameyî destbendkerdene la tim zî ser kewtî. Raştîye tim ser kewte, çapemenîya azade tim ser kewte. 14ê gulane rê tay mend. Îqtîdarî tersê binkewtişî ra operasyonê winayênî kerdî. 14ê gulane de ma tersê înan bivurnê raştîye.''