Badê ke Serekkomarê Almanya Steînmeîerî roja îne Erdogan dawetê werdî kerd, hetanê cîya-cîyayan ra pêsero qerarê boykotkerdişê Erdoganî yeno. Tewr peynî Serekê Şaredarîya Berlînî Mîchael Mullerî zî aşkere kerd ke o do beşdarê werdî nêbo.
Serekkomarê tirkî Recep Tayyîp Erdogano ke têkilîyanê xo bi dewleta almanan xurt keno, bi serran ra dima reya sifteyîne ya ke bi hawayo fermî Almanya zîyaret keno. Herçiqas ke muxalefetê Almanya û raya pêroyî nêwazenî zî îdareyê Berlînî do Erdogan bikero meyman.
Erdogano ke do 3 rojî Almanya de bimano, hîna nêameyo labelê nika ra programê xo bedilna. Verê cû amebi aşkere kerdene ke do roja pancşeme Berlîn de bibo, labelê do siba mîyanê roje ra dima şêro Almanya. Erdogan do otelê Adlonî de bi hetgiranê xo bêro têhet.
Seba ke hukmatê Merkele destûr nêdayo ke Erdogan salonanê girdan yê Berlîn û Kolnî de xîtabê hetgiranê xo bikero, Erdogan do kombîyayîşêko şenik bikero.
BOYKOT HÎRA BENO
Heto bîn ra Serekkomarê almanan Frank Walter Steînmeîerî zî do Erdogan qesra xo de bikero meyman û werd bido ey. Vera nê werdî de reaksîyonî her ke şono zêde benî. Ewil Endamê Yewîya Demokratanê Hurî Bîjan Djîr-Saraî û parlamentera Partîya Çepî Sevîm Dagdelene vera nê dawetî de qerarê boykotî girewtbî. No boykot her roje hîna zaf hîra beno.
Tewr peynî Serekê Şaredarîya Berlînî Mîchael Mullerî zî qerarê boykotkerdişê dawetî girewt. Qerarê boykotî eynî wext de muxalefetê almanan zî ardo têhet. Serekê FDPyî Chrîstîan Lîndner, Hemserekê partîya Keskan Alexander Gauland û Alîce Weîdel zî aşkere kerdbî ke ê do nêşêrî dawet. Heta nika tena Serekê Partîya Keskan yê veren Cem Ozdemîrî dîyar kerdo ke beşdarê dawetî bibo.
Do şanê roja îne bi rayberîya platformê ‘Ti xêr nêameyî Erdogan’ (Erdogan Not Welcome) Potsdamer Platz ke merkezê Berlînî de yo de çalakîyêk bêra viraştene. Rayîrraşîyayîş do saete 16.00 dest pêbikero.
