Bajaranê Berlin, Hamburg û Esslingenî yê Almanya de bi aktîvîteyanê cîya cîyayan şehîdê Menga Gulane ameyî yadkerdene. Aktîvîteyan de derheqê têkoşînê şehîdan de sînevîzyonê ameyî ramojnayene û xoverdayîşê gerîlayan ame selamkerdene.

Berlîn de hetê Meclîsê Cinîyan ê Dest-Dan û Meclîsê Nav-Berlinî ra aktîvîteya yaderdişî ameye organîzekerdene. Aktîvîteya ke Merkezê Komelê Demokratîkî yê Kurdan ameye kerdene xeylêk kesî tewrê ci bîyî. Hemserekê Nav-Berlinî Huseyîn Yilmazî vat: ''Ma  ganî semedê pawitişê mîrasê şehîdanê xo çîyo ke destê ma ra yeno bikerê. Xebata ke ma rayra benê, qîm nêkena. Ganî têkoşîn bêro xurtkerdene.''

Hamburg de aktîvîteya ke hetê Komîsyonê Keyeyanê Şehîdan û  pabesteyanê MLKPyî ra ameye organîzekerdene Merkezê Komelê Demokratîkî yê Kurdan de ameye kerdene. Bi nameyê Komîsyonê Keyeyanê Şehîdan waya kadroyanê serkêşan ê PKKyî ra Mehmet Xeyrî Dûrmûşî Aytene Dûrmûş qisey kerd. Dûrmûşe vat: ''Ma her çîyê xo deyndarê şehîdanê xo yê. Ma do wayîrê ercanê ke şehîdan bi rişnayîşa gonîya xo fînayî dest, bivejîyê.''

Merkezê Komelê Demokratîkî yê Kurdan ê Esslingen de zî bi eynî waştişî aktîvîte ameye kerdene. Aktîvîteya ke bi desan kesî tewrê ci bîyî de sîyaseymedaro kurd Îmam Canpolatî qisey kerd. Canpolatî vat: ''Têgêrayîşê Azadîye yê Kurdî ewro têkoşînê estbîyayîş û çînbîyayîşî dano. Gerîlayî Zap de reçê şehîdan destanan nusenê. Ganî ma zî her ca de wayîrê nê xoverdayîşî vejîyê.''