33 Raywanê Xeyalan 20ê temmuza 2015î de qezaya Pirsûsî ya Riha de hêrişê DAÎŞî de ameybî qetilkerdene. Şehîdê Qirkerdişê Pirsûsî xeylêk şaristanan de serê goranê xo de ameyî yadkerdene.

Wan

Goristanê Karşiyakayî yê qezaya Rêya Armûşî de Yunus Emre Şen serê gorê xo de ame yadkerdene. Hemserekê MEBYA DERî Yusuf Dîndarî tîya de ard ziwan ke ê do tim rayîrê şehîdanê Pirsûsî de şorê. 

Platformê Kede û Demokrasîyî zî Kuçeyê Hunerî de eşkerayîyêke daye û waşt ke wa faîlê nê qirkerdişî bêrê cezakerdene. Eşkerayîye bi sloganê ''Şehîd namirin'' qedîyaye.

Mûş

Denîz Erol, Medalî Barutçu û Serhat Devrîm serê goranê xo de ameyî yadkerdene. Serekwekîlê DEM Partî Seza Temellî û keyeyî beşdarê yadkerdişî bîyî. Temellîyî yadkerdiş de ard ziwan ke faîlanê nê qirkerdişî ra hayîya dewlete est bîya la rixmê ney zî dewlete çîyêk nêkerd. Qiseykerdişan ra dima qeranfîlî ronîyayî goran ser.

Colemêrg

Suleyman Aksu Gever de Goristanê Taxa Ormanî de ame yadkerdene. Hetkarê Hemserekanê Pêroyî yê DEM PArtî Vezîr Coşkun Parlak, Wekîlê Colemêrgî Onur Duşunmez, KESK, TMMOV, ÎHD, DÎSK, DEM Partî, DBP, Mayê Haştîye û xeylêk kesî beşdarê yadkerdişî bîyî. Parlakî yadkerdiş de 33 Raywanê Xeyalan sey şehîdanê ''Şorişê Rojawanî'' pênase kerdî. Dadîya Aksuyî Kudrete Aksu zî îfade kerd ke ê edaletî wazenê.

Mêrdîn

Murat Yurtgul û Emrullah Akhamur serê goranê xo de ameyî yadkerdene. Xeylêk kesî Goristanê Malakaqoyî ya Qoserî de ameyî têhet. Qiseykerdişan de ame parekerdene ke qirkerdişî ser o 9 serrî derbaz bîyê la hema zî kiştoxî nêameyê dîyene.

Anqara

Komeleya Heqanê Merdiman bi wesîleya serrgêra Qirkerdişê Parisî eşkerayîyêke daye. 

Şirnex

Serê gorê Hogir Ozkanî de Cizîre de yadkerdişêk ame kerdene. Tîya de ame cayene ke 33 raywanan teyna domananê Kobanê rê hacetê kaykerdişî berdêne.

Îstanbul

Duygu Tuna, Îsmet Şeker û Cemîl Yildiz Goristanê Gazî yê qezaya Sultangazî yê Îstanbulî de serê goranê xo de ameyî yadkerdene.Hemsereka ESPyî Ozleme Gumuştaş, Wekîla DEM Partî Kezbane Konukçu, Hemsereka DEM Partî Murat Kalmaz û xeylêk kesî yadkerdiş de amade bîyî. Polen Unlu û Hatice Ezgi Sadet Goristanê Ihlamurkuyî yê Umranîye, Vatan Budak Goristanê Kartalî yê Gazîosmanpaşayî de ameyî yadkerdene. Yadkerdişan de ame vatene ke ê do hesabê qirkerdişê Pirsûsî bipersê.