20ê temmuza 2015 de qezaya Pirsûsî ya Riha de hetê çeteyanê DAÎŞî ra hêrişo bombayin ame kerdene û 33  ciwanan dinyaya xo bedilnaye. Serrgêra 8. ya qirkerdişî de semedê yadkerdişê ciwanan Pirsûs û mezalanê nê ciwanan ser, ê ke bajaranê cîya cîyayan de yê, aktîvîteyê vîrardişî ameyî kerdene.

Pirsûs de vîrardiş bexçeyê Merkezê Kulturî yê Amara ke 33 ciwanî tede ameyî qetilkerdene de, programê vîrardişî ame kerdene. Wekîlê Partîya Çep a Keske, rêxistinê komelê sîvîlî û huqûqî û îdarekarê partîyanê sîyasîyan tewrê vîrardişî bîyî. Şaro ke verê banê HDPyî yê Pirsûsî de ame pêser heta verê Merkezê Kulturî yê Amara bi slogana ''Ciwanî do qetlkaran ra hesab bipersî''  rayra şi. Barê rayraşîyayîşî cayê qirkerdişî de gulî ameyî ronayene.

Endamê Federasyonê Komeleyanê Ciwanan ê Sosyalîstan (SGDF) Seneme Nur Pektaş vat, ''Înan waşt ke xeyalanê ma nîmcet biverdê. La bi qirkerdişî nêeşkeyî verê xeyalanê ma bîgêrê. Badê 8 serran ma reyna newtewa kurdan rê azadîye wazenê.  Xeyalê înan bîyî xeyalê mîlyonan.  Têkoşînê ma yê semedê Pirsûsî dewam keno. Hemrayê înan semedê caardişê xeyalanê înan şer kenê.''

Soner Çîçeko qirkerdiş de birîndar bibi vat, ''Înan waşt xeyalanê ma tîya bikerê binê erdî la fikranê ma tîya de zîl da. 33 ciwanî semedê paştdayîşê Şorişê Rojawanî tîya ameybî têhet. Şoriş dewam keno. Ma do heta peynî wayîrê şorişî bivejîyê. Têkoşînê Keyeyê Şenyaşarî zî têkoşînê ma yo.''

Reyna qiseykerdoxanê bînan zî ciwanî ardî vîrî, dej û hêrsê xo ard ziwan û vat ê do wayîrê têkoşînê şarê Rojawanî bivejîyê û xeyalanê ciwanan ê şehîdan bîyarê ca.

Pulurê Dêrsimî de zî Çagdaş Aydino ke qrikerdiş amebi qetilkerdene dewa Çaperî de serê mezelê ci de ame vîrarene. Xeylêk îdarekarê partîyanê sîyasîyan tewrê vîrardişî bîyî. Hemserekê HPDyî yê Dêrsimî Ferhat Yildizî vat ê do xeyalanê 33 ciwanan ke nîmcet mendî, bîyarê ca. Badîyê Adini Fetî Aydin zî vat heta ke qetilkerdî bêrê cezakerdene ê do têkoşînê xo bidomnê.

Hetê bînî ra  Amed, Wan, Mûş û Îstanbul de zî ciwanê ke qirkerdiş de şehîd bîyî, serê mezalanê xo de ameyî vîrardene. Qiseykerdişan de mesajê xurtkerdişê têkoşînî ame dayene.