Pawitox û merdimanê Wekîlê AKPyî Halîl Îbrahîm Yildizî 14ê hezîrana 2018î de qezaya Pirsûsî ya Riha de hêrişê keyeyê Şenyaşar kerd û Haci Esvet Şenyaşar, Celal Şenyaşar û Adîl Şenyaşar kiştî. Ferît Şenyaşarî hêrişî ra pê birînan xelisîya.  Serebût de Mehmet Şah Yildiz zî merd. 2ê Nîsane de Mehkemeya Cezaya Girane ya Meletî cezaya zîndanî ya 37 serran û 9 mengan daye Fadil Şenyaşarî û cezaya zîndanî ya 18 serran zî daye Enver Yildizî. Ferît Şenyaşar û dadîya ci Emîne Şenyaşar wextêkî ra nata verê Edlîyeya Riha de Nobeta Edaletî gênê.

Ferît Şenyaşarî da zanayene ke eke muhakemekerdişêko edîl biameyêne kerdene Fadil Şenyaşar nika teber de bîyêne û vat: ''Dikana ma de kamerayî estê. Dîmenan de dîyeno ke ma 5 birayan xo pawit. Ma na ceza qebul nêkenê. Ma do muracatê Mehkemeya Îstînafî bikerê. Ma do têkoşînê xo dewam bikerê. Mehkeme de hesabê qirkerdişê Nêweşxaneyê Pirsûsî nêame kerdene. Verê çimanê her kesî de qirkerdiş ame kerdene. Hema zî derheqê dosyaya serebûtê nêweşxaneyî de bira nimite esta. Mi hîs kerd ke keyeyê Yildizî mehkeme rê teda keno. Kiştoxan rê ceza nêdîyaye. Têna Enver Yildizî rê cezaya 18 serran dîyaye. No kes zî çend mengan ra dima do bêro veradayene. La hêzê dewlete peyê ma de gêrenê û hêrişê ma kenê.''

Ferît Şenyaşarî ard ziwan ke înan têna heqê xo yê xopawitişî şuxilna û vat: ''Edalet seba her kesî lazim o. Ma do têkoşînê xo yê edaletî rê dewam bikerê. Heta birayê mi Fadil nêro veradayene û kiştoxî nêrê hukmkerdene ma do têkoşînî ra fek vera nêdê. Kesê ke hetê edaletî gênê wa paştî bidê ma. Ma venga rêxistinanê komelê sivîlî, pawitoxanê heqanê merdiman û hêzanê demokratîkan danê ke wa paştî bidê ma. Nê serebûtî de qurban ma yê. Ma do verê edlîye de nobeta xo rê dewam bikerê. Ê ma erdî ra kaş bikerê û ma bikişê zî ma do waştişê edaletî ra fek vera nêdê.''