Wekîlê Parlamentoyê Kantonê Ticinoyî yê Swîsre û Serekê Swîsre yê Beşê Doktoranê Mîyanneteweyîyan ê Seba Vergirewtişê Şerê Nuklerî (IPPNW) Dr. Beppe Savary-Boriloliyî Medya Haber TVyî de derheqê tecrîdê giranî yê vera Rayberê Şarê Kurdî Abdullah Ocalanî de qisey kerd.

Dr. Beppe Savary-Borioliyî ard ziwan ke kerdişê vera Abdullah Ocalanî dûştê qanûnan ê û sûc ê û vat: ''Abdullah Ocalan tay wayîrê pozîsyonê Nelson Mandelayî yo. La şert û mercê Îmraliyî ê Girawa Robbenî ra giranêr ê ke Mandela tede 27 serrî tepişîyabi. Dima ke Mandela azad bi Afrîkaya Başûre de meseleyî çareser bîyî. La ganî ez vaja ke Birêz Dik Martyo ke Konseya Ewropa reyde têkilîyê ci yê rindî est ê, mi rê vat ke 'Bi her hawayî Konseya Ewropa rewşa Abdullah Ocalanî teqîb keno.' La 27 mengî yo Birêz Ocalanî ra xeberêke nêna girewtene û no zî beno sebebê qesawetî.''

Dr. Beppe Savary-Borioliyî bale ante prosesê endamîya NATOyî ya Swêd û Fînlandîya ser û vat ke Erdogan bi rayîrê tecrîdî şantajî keno. Savary-Borioliyî dîyar kerd ke sere de Almanya ganî welatê Ewropa vera kerdişanê Erdoganî gamanê tûjan bierzê.

Dr. Beppe Savary-Borioliyî vat ke Amerîka û Ewropa sîyasetê Tirkîya yê vera kurdan de wayîrê rolan ê û vat: ''Amerîka şerê vera DAÎŞî de paştî dabî kurdan. Kurdî bi bedelanê giranan ser kewtî. La dima kurdî teyna ameyî verdayene. Ma sey IPNNWyî şîyî Silêmanî û sînorê Tirkîya ke çekanê nukleran ê artêşa tirke ser o cigêrayîş bikerê. La qeymeqamê Amedîyê waştişê Tirkîya ser o ma asteng kerdî. Ganî welatêkê Yewîya Ewropa OPCWyî ra biwazo ke derheqê şuxilnayîşê çekanê kîmyewîyan de Tirkîya tehqîqat bikero. La welatê Ewropa xo nêzdîyê nê çî nêkenê.''

Dr. Beppe Savary-Borioliyî rexne kerd ke PKK 'lîsteya terorî' de yo û vat: ''PKK têkoşînê çekdarî keno û hêrişê vera sicîlan red keno. Heyf ke meseleya kurdan bêçek qet çareser nêbîya. Artêşa tirke çend ke wayîra teknolojî biba û xurt biba zî pê xoverdayîşê kurdan nêeşkena. Erdogan zî wazeno vera kurdan serkewtişêkî bivisno destî.  Erdoganî weçînayîşan de se ra 50ê rayî girewtî. Yanî nêmeyê komelî ey ra razi nîyo. Ganî warê mîyanneteweyî, bi taybetî welatê Ewropa Erdoganî rê teda bikerê. Erdogan wazeno tewrê Yewîya Ewropa bibo. O çax welatê Ewropa eşkenê ci rê teda bikerê ke Erdogan heqanê merdiman rê hûrmet bikero.''