Aynure Taşa ke Îstanbul de manena, birayê aye Serhat Karsu Zîndanê Dumluyî de tepişte yo. Lajê Aynure şerwanê YPGyî Mazlûm Taş (Andok Farqîn) zî 2018 de şehîd bi la cenazaya ey nêdîyaye dadîye. Aynure ajansê ma rê qisey kerd.

Aynure da zanayene ke birayê ci Serhat Karsu rê cezaya zîndanî ya 126 serran dîyaya û o hucreyê yewkesî de tepişîyeno. Aynure vat: ‘’Mîdeya Serhatî de nêweşîye est a. O serrî yo o na nêweşîye anceno û nêno tedawîkerdene. Ma babete viste rojdemê çapemenîye û muracatê ÎHDyî kerd. ÎHD şi zîndanî, dima Serhat wedarîya nêweşxaneyê zereyî la doktorêkî ey rê vato ‘ez do to nêşawa nêweşxaneyî. Ti do tîya de bimirî.’ Ganî Serhat şoro doktoranê bînan. Birayê mi xora hucreyê yew kesî de tepişîyeno û rewşa ey bena giranêr. Ganî Serhat û tepişteyê nêweşî yê bînî vera bidîyê.’’

Aynure pare kerd ke cenazaya lajê ci Mazlûmî Goristanê Avesta yê Rojawanî de yo û vat: ‘’Ez nêeşkaya cenazaya lajê xo bigêra. Goristanê Avesta zî ameyo xerakerdene. Lajê mi pa 70 embazanê xo ameyo definkerdene. Ez esteyanê lajê xo ra razî ya. Rixmê hendê çî zî ez ancî haştîye wazena. Wa hinî dadîyî mebermê. Ez esteyanê lajê xo wazena.

Domanê ma destê ma ra şîyî la ma haştîye wazenê. 10 serrî yo ez nêeşkena lajê xo yê bînî ra xebere bigêra. Çîyo ke ez wazena haştî ya.’’