Nizdîyê 20 serrî yo ke Rayberê Şarî Kurdî Abdullah Ocalanî ser o tecrîdêko girankerde esto. 5ê nîsana 2015î ra nata ey ra qet xeberêk nîna girewtene. Kurdî seba weşî û ewleyîya ey ra qesawet kenî. Serra 2008î de avûkatanê Ocalanî seba ke cuya ey tehlukeyî de ya, muracatê Dadgeha Heqanê Merdiman ya Ewropa kerdbî. Muracatî ra 10 serrî cuwa pê dadgehe qerar girewte ke aye na dosya gêna dest. Goreyê xebera rojnameyê Yenî Ozgur Polîtîka do 27 êlule de na dewa bêro vînayene.

Serra 2008î de vera Ocalanî de xeylê hêrişî amebî viraştene. Vera nê hêrişan sere de hepsîyê PKK û PAJKî her cayo ke tede kurdî estî de bi çalakîyan wayîrê Ocalanî vejîyayî. Sere de Kurdîstan û Ewropa û xeylê cayanê dinya de bi çalakîyanê tesîrinan kurd û hetê demokratî weriştî lingan ser. Serewediritişî ra dima hukmat hêrişê ke vera Ocalanî de estî înkar kerd.

Çalakîyanê Kurdîstanî de hêzê dewletê bi pêroyê îmkananê xo yê teknîkî hêrişê şarî kerd. Xeylê kesî herişê wesayîtanê zirxinan û bombeyanê gazî ver birîndar bîyî. Bazîd de genco bi nameyê Ahmet Ozkan bi çekê polîsan ame qetil kerdene. Goreyê bîlançoya Komeleya Heqanê Merdiman (ÎHD) protestoyanê 18-22ê 2018î de kesêk amebi qetil kerdene, 90 kesî zî bi guleyê polîsan û fîşekê gazî ver birîndar bîbî, 397 kesî zî tepişîyayî û qeraqolan de îşkence dîyî.

Nika kurdî na dawa ra çi pawenî. 27ê êlulê de do bêro vînayene gelo AÎHM reyna goreyê menfîetê xo qerar gêna yan seba caardişê edeletî gamêk erzena?