Çarçewa Hemleya 'Abdullah Ocalanî rê Azadîye, Meseleya Kurdan rê Çareserîye Sîyasîye' de vizêr şaristanê Kolnî yê Almanya de bi beşdarîya bi se hezaran kesan rayraşîyayîş û mîtîng ameyî kerdene.

Rayraşîyayîşî ra dima mîtîng ame kerdene. Mîtîng de hêverî mesajî ameyî wendene û qiseykerdişî ameyî kerdene.

Dima avûkatanê Rayberê Şarê Kurdî Abdullah Ocalanî ra Omer Guneşî qisey kerd. Guneşî da zanayene ke hîrê serrî yo Rayberê Şarê Kurdî ra xebere nêna girewtene û vat: ''Cayêkê bînî de tecrîdêko winayên çin o. Bêvengîya vera nê tecrîdî zî nêna qebulkerdene. Ez venga pêro dezgehanê mîyanneteweyîyan û huqûqî dana ke peynîya ney bîyarê. ''

Guneşî ra dima Hemserekê KNKyî Ahmet Karamusî nameyê partîyanê Kurdîstanî ser o qisey kerd û vat: ''Ez nameyê partîyanê Kurdîstanî ser o Rayber Appoyî selam kena. Tîya de şarê ma îradeyêko pîl mojna. Ma hêvî kenê ke no îrade do tecrîdî bişikno. Ocalan temsîlkarê çar parçeyanê Kurdîstanî yo. Şarê kurdî hînî azadîya temsîlkarê xo wazeno.

Ez wazena tîya ra mesajêkî bida dewleta Almanya û Yewîya Ewropa zî. Destekê şima yê bi dewleta tirke sûc o. Ganî şima tedaya dewleta tirke bikerê û paştî nêdê rejîmê AKP-MHPyî yê faşîstî. Seba çareserîya meseleya kurdan azadîya Rayber Apoyî lazim a.''

Mîtîng de nameyê TJK-E ser o Aytene Kaplan dîyar kerd ke armancê Komployê 15ê Sibate çinkerdişê têgêrayîşê kurdan bi la kurdî 25 serrî yo bi xoverdayîşê xo hetê Abdullah Ocalanî de yê.

Endama Yewîya Suryanîyanê Ewropa Manuella Demîr û Endama Yewîya Hêzê Demokratîkî Çîgdeme Davran zî mîtîng de qisey kerd. Têgêrayîşê Ciwanan û ciwananê enternasyonalîstan zî eşkerayîya xo daye.