Şaristanê Kolnî yê Almanya de çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de bi beşdarîya bi se hezaran kesan rayraşîyayîş û mîtîngêk ameyî kerdene.

Bi se hezaran hêverî rayraşîyayîş kerd. Rayraşîyayîş de pankart û fotografê Rayberê Şarê Kurdî ameyî kiriştene. Rayraşîyayîş de tecrîdê Îmraliyî ame protestokerdene. Rayraşîyayîş de komanê enternasyonalîstan zî cagirewt. 

Polîsanê almanan xîret kerd ke provakasyon vejê. Wexto ke raywanî serê Pirdê Renî ra derbaz bîyêne pird lerza.

Dima warê Siegburger str Deurzer Werî de mîtîng dest pêkerd. Warê mîtîngî bi posteranê Rayberê Şarê Kurdî xemilîya. Mîtîng bi deqayêkê rêzgirewtişî û merşê Ey Reqîbî dest pêkerd. 

Mîtîng de hêverî Hemserekanê KCDK-E Zubeyde Zumrut û Engîn Severî qisey kerd. Înan ard ziwan ke 25 serrî yo kurdî seba azadîya Rayberê xo payan ser de yê û çew nêeşkeno nê îradeyî bişikno. Hemserekan vat ke şarê kurdî heta peynî seba azadîya Ocalanî têkoşîn bikero.

Hemserekanê KCDK-E ra dima koroyê TEV-ÇANDî vejîya sehne ser û deyîrê xo vatî.

Dima mesajê dostanê kurdan ameyî wendene. Sereka Komîsyonê Hemwelatîyanê Tirkîya yê Yewîya Ewropa (EUTCC) Prof. Kariane Westerheim mesajê xo de vat ke rolê Abdullah Ocalanî seba haştîya herême zaf girîng o coka o cade wa bêro azadkerdene.

Wezîrê verênî yê Îzlande û endamê Heyetê Îmraliuî Ogmunder Jonassoyî mesajê xo de pare kerd ke ganî seba azadîya Abdullah Ocalanî hîna zaf têkoşîn bêro kerdene.

Dima mesajê sendîkayanê Spanya ameyî wendene.

Nînan ra ber mesajê xeylêk dostanê kurdan û grubanê çepan ê Tirkîya zî ameyî wendene. Mesajan de bale ameye antene girîngîya azadîya Abdullah Ocalanî ser û tecrîdê Îmraliyî ame şermezarkerdene.